MIFARANA NY TAOM-PIASANA 2021 – 2023? MANOMBOKA NY TAOM-PIASANA 2024-2026. NISAOTRA NY MPIKAMBANA TEO ALOHA ARY NIARAHABA NY MPIKAMBANA VAOVAO NY MINISTRY NY FITSARANA.

📌 Talata faha-5 Desambra 2023, teto amin’ny Hôtel Colbert, ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana, Filoha Lefitry ny CSM dia nisaotra ireo Mpikambana nahavita ny asa nandritra ny telo taona. Nambarany fa tsy mora izany, noho ity rafitra ity, misahana ny fanapahan-kevitra mikasika ny Mpitsara, nefa tsy maintsy tanterahana.

➡ Tao anatin’izay telo taona izay mantsy dia 3.188 ny raharaha nandalo teo anivon’ny CSM. Ny 13 isan-jato no mahakasika ny fitsipi-pitondrantenan’ny Mpitsara. Ny ankoatr’izay dia mikasika ny fitantanana ny asan’ny Mpitsara. 500 ny fanapahan-kevitra tamin’ny famindran-toerana. Ary 11 no isan’ny fanendrena ireo tompon’andraikitra isan’ambaratonga eny anivon’ny sampam-pitsarana. 62 ny fangatahana fihofanana.

⭕ Tetsy ankilan’izay, niarahaba sy nankahery ny Mpikambana vaovao amin’ny asa miandry mandritry ny telo taona ho avy ny Mpitahiry ny Tombokasem-panjakana, Minisitry ny Fitsarana. Nambarany mantsy fa betsaka ny vitan’ny Mpikambana teo aloha, ary antenaina fa tsy ho latsa-danja amin’izany ny ho avy.
Notoloran’ny Minisitra taratasy mari-pankasitraha ireo Mpikambana teo aloha, ho marika fa nahatontosa ny andraikitra nankinina taminy izy ireo.

📍Marihina fa 20 no isan’ny Mpikambana eo anivon’ny CSM.

🎤 Atolotra anao ny lahatenin’ny Mpitahiry ny Tombokasem-panjakana, Minisitry ny Fitsarana , RANDRIAMANANTENASOA Landy Mbolatiana nandritra ny famaranana ny taom-piasan’ny Filankevitra Ambony ny Mpitsara (CSM) teto amin’ny Hotel Colbert Antaninarenina.

TAO AMIN’NY TONKOTANY MALALAKY NY FITSARANA TAMPONY NO NANAOVANA NY FANANGANAN-TSAINA. NITARIKA IZANY NY MINISTRA RANDRIAMANANTENASOA LANDY MBOLATIANA.

📌 Alatsinainy faha-4 Desambra 2023, teto amin’ny Fitsarana Tampony Anosy no notanterahana ny fananganan-tsaina niarahan’ny Fianakaviamben’ny Minisiteran’ny Fitsarana. Nitarika izany ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana ka taorian’ny fiarahabany ny Mpiara-miasa niatrika ity fanomezam-boninahitra ny Firenena ity dia namelabelatra ireo asa vita nandritry ity taona ity. Tao anatin’izany ny fametrahana ny « politique pénal », ny fanafainganana ny raharaham-pitsarana ady heloka sy ady tany, ny fametrahana ny fomba fitantanana vaovao ny « Camp Pénal », ny fanapariahana ny lalana tamin’ny alalan’ny Fiara Zo, izay nitetezana Faritra, ny fiaraha-miasa tamin’ny haino aman-jery sy ny Gazety an-tsoratra. Nisongadina ihany koa ny fanokafana Fitsarana Ambaratonga Voalohany tao Ste Marie sy Ambilobe, ho fanatanterahana ny vina: Fitsarana manakaiky vahoaka, indrindra ny fandraisan’andraikitry ny Mpitsara tamin’ny nahatontosana ny fifidianana tamin’ny alalan’ny asa natao teny anivon’ny SRMV.

⭕ Nanamafy ny tenany fa betsaka ny tokony mbola hatsaraina amin’ny fomba fiasa ka izany no nanentanany ny Mpiasa rehetra hamita tanteraka ny asa mba tsy hisian’ny vary mangatsiaka amin’ny taona ho avy.

⭕ Ity no fananganan-tsaina farany amin’ny taona 2023, ary afaka andro vitsy dia hiditra amin’ny Fotoana Fialan-tsasatra (vacances judiciaires) ny Fitsarana.

CSM (Conseil Supérieur de la Magistrature): MAMARANA NY FOTOAM-PIASANA, MITARIKA NY FIVORIANA NY MPITAHIRY NY TOMBOKASEM-PANJAKANA, MINISTRY NY FITSARANA.

📌Alatsinainy faha 4 Desambra 2023, eto amin’ny Biraon’ny CSM ( Conseil Supérieur de la Magistrature) eto Tsaralalana, manatanteraka fivoriana ny Mpikambana. Mitarika izany ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana, izay Filoha Lefitry ny CSM.

➡Fivoriana farany ho an’ny CSM amin’ity taona ity sady famaranana ny fotoam-piasan’ireto Mpikambana ireto izao tanterahana izao ka sady nisaotra azy ireo tamin’ny asa vita ny Minisitry ny Fitsarana no nitondra sosokevitra amin’ireo zava-dehibe tokony mbola handraisana fanapahan-kevitra mandritra ity fivoriana farany ity. Ny Talata faha-5 ny Volana Desambra 2023 mantsy no hanaovana ny famindram-pahefana amin’ireo Mpikambana vaovao handrafitra ny CSM, amin’ny fotoam-piasana manaraka.

FITALEAVAM-PARITRY NY FANDRAHARAHANA NY FONJA ANALAMANGA: NAHAZO FITAOVANA SAMIHAFA HO FAMPANDEHANAN-DRAHARAHA.

📌 Alarobia 29 novambra 2023, nandritra ny fanolorana ireo fitaovana avy tamin’ny Fandaharan’asa Fanarenana, amin’ny alalan’ny Tetik’asa Mikolo Aina, ho an’ny Fitaleavam-paritry ny Fandraharahana ny Fonja Analamanga, dia nihaiky ny Talem-paritry ny Fandraharahana ny Fonja eto Analamanga Andriamatoa Berthin RAKOTOMAMONJY fa mamaly tsara ny filan’ny Fitaleavam-paritry ny Fandraharahana ny Fonja Analamanga izao ary indrindra tena hampandroso ny asan’ireo Mpandraharahan’ny fonja.

🎥 Manasa antsika hanaraka ny fanadihadiana manontolo.

FITAZONANA AM-PONJA IREO MANAMBONINAHITRA ROA EO ANIVON’NY TAFIKA: MITONDRA FANAZAVANA NY TONIA MPAMPANOA LALANA AO AMIN’NY FITSARANA AMBARATONGA VOALOHANY ANTANANARIVO.

📌 Talata 28 novambra 2023, nitondra fanazavana, araka ny lalàna, ny Tonia Mpampanoa Lalàna ao amin’ny Fitsarana Ambaratonga Voalohany Antananarivo, Ramatoa NARINDRA RAKOTONIAINA, mahakasika indrindra ny fitazonana am-ponja ireo manamboninahitra roa (02) tao amin’ny tafika.

🎥 Manasa antsika ary hanaraka izany.