📌Zoma 16 febroary 2024, tonga teto amin’ny Kaominina Ampitatafika ny Fitaleavana misahana ny Fanampariahana sy Fandinihana ary Fanavaozana lalàna (DERL) eo anivon’ny Minisiteran’ny Fitsarana, nampahafantatra ireo lalàna vaovao sy ireo izay nasiana fanovàna.

➡️Karazana lohahevitra samihafa no nentina, tao ny momba ny:
– Fananantany (karatany, tanim-panjakana)
– Sora-piankohonana (fahaterahana, fananganana, fanjanahana,…)
– Lalàna momba ny fandovàna
– Ny herisetra mifototra amin’ny mahalahy na mahavavy (na ara-panahy na ara-batana, ara-nofo, ara-tsaina, na ara-pihariana).

⭕Tsapa fa mangetaheta fahalalàna ny vahoaka ary liana ny ahafantatra ny tokony atao eo anatrehan’ny Fitsarana.

📌Alakamisy 15 febroary 2024, tafatsangana teto Amin’ny Faritra Amoron’i Mania ny  » Plateforme Multi services » MAROLAFY. Natolotra tamin’ny fomba ofisialy ny Birao mandrafitra azy sy programan’asa ho tanterahana. Nampafantarina nandritra io fotoana io ihany koa fa miara- miasa amin’ny « Consortium MITSINJO » ao anatin’ny fandaharan’asa FANARENANA vatsian’ny AFD (Agence Française de Développement) vola ny fanatanterahana ny tetikasan’ny Vononana MAROLAFY.

➡️Tanjona ny hametrahana lamina maty paika ho famerenana ny voafonja eny anivon’ny Fiarahamonina, fametrahana asa hiteraka loharanombola ( AGR) eny anivon’ny fonja, fijerena manokana ny mahaolona ary indrindra ny fanofanana arak’asa marosamihafa.

⭐Nanotrona izany fivoriana izany ny tompon’ andraikitra avy ao amin’ny Faritra Amoron’i Mania na ny olom-boafidy na ny olom-boatendry, ny sampandraharaham- panjakana rehetra notarihin’ireo fiarahamonim-pirenena, fikambanana miisa 45. Tonga nanome voninahitra izany ihany koa ny Sekretera Jeneralin’ny faritra, Sekretera Jeneralin’ny Prefektiora, ny Filohan’ny Delegasionina manokana eo anivon’ny Kaominina Ambonivohitra Ambositra, ny Tonia Mpampanoa Lalana eto Ambositra ary ny Talem-paritry ny Fandraharahana ny Fonja Amoron’i Mania.

📌Zoma faha 15 Febroary , teto Nosy be no natao ny fivoriana misokatra ho an’ny tompon’andraikitra rehetra mikasika ny fandriampahalemana. Nitarika izany ny Praiminisitra NTSAY Christian.

➡️Ankoatry ny fandriampahalemana an-dranomasina sy ny valan’ aretina  » choléra ary ny sida » dia NODINIHANA manokana ny resaka fanolanana sy ny fizahantany mamoafady. Isan’ny nitondra fanazavana mikasika izany ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA Landy Mbolatiana, izay niatrika ny fivoriana.

📌 Alarobia faha 14 Febroary 2024, nijery ny fanamboarana tokony ho atao ao amin’ny « Centre de rééducation », Toby Fanarenana eto Joffre Ville ny Mpitahiry ny Fitombokasem-panjakana, Ministry ny Fitsarana RANDRIAMANANTENASOA Landy Mbolatiana. Nilaza izy fa tsy maintsy ho sokafana ny Toby, mba ahazoana manasaraka ny toerana misy ny Zaza tsy ampy taona, ny Vehivavy ary ny Lehilahy. Natao ihany koa mba ho fanamafisana ny fanabeazana sy famolavolana ireo Zaza niditra am-ponja, ahafahan’izy ireo manova ny fomba fiainany rehefa miverina eny anivon’ny fiarahamonina.
📊 Raha ny eto Antsiranana, 908 no isan’ny Voafonja, 45 amin’ireo ny Vehivavy, 33 ny Zaza tsy ampy taona ka 9 no efa nandalo Fitsarana ary voaheloka, ny 24 kosa dia voatazona vonjimaika.

🎯 Ny fisokafan’ity Toby Fanarenana ity arak’izany dia hanatsara ny fitantanana ny Voafonja, indrindra amin’ny fanajàna ny zon’olombelona. Marihana fa Voafonja miisa 150 no zakan’ity « centre de rééducation » ity.

📌 Alarobia 14 Febroary 2024, teto Antsiranana, nihaona tamin’ny Mpitsara sy ny Mpirakidraharaha eo anivon’ny Fitsarana Ambony ny Mpitahiry ny Fitombokasem-panjakana, Ministry ny Fitsarana RANDRIAMANANTENASOA Landy Mbolatiana.

🎯 Nandritra izany no nitondrany fanazavana mikasika ny « andry fahatelo » amin’ny Politikam-panjakana izay mahakasika ny Ministeran’ny Fitsarana, anatin’izany ny fangaraharàna eo amin’ny fitantanana ny asam-panjakana sy ny ady amin’ny kolikoky. Nohamafisiny fa hapetraka ny « standard de service », vokarina ny « Carnet de suivi » ho an’ny manan-draharaha eo anivon’ny Fitsarana mba ahazoan’ny olona manaraka ny fizotran’ny raharahany. Hohamafisina ny fitsirihana anatiny (contrôle interne). Nanome baiko izy fa tsy maintsy hatao ny fitsirihana tampoka ny fonja mba ahitana ny tena zava-misy.

🖥️ Nandritra ity fihaonana ity no namalian’ny Ministra RANDRIAMANANTENASOA Landy Mbolatiana ny fangatahan’ny Mpiasa teto anivon’ny Fitsarana Ambony eto Antsiranana, ny hamatsiana ara-pitaovana azy ireo, ka solosaina miisa 10 miaraka amin’ny kojakoja miaraka aminy ary « imprimante » ho azy ireo. Tafiditra ao anatin’ny fanatsarana ny fitantanana ny asam-panjakana rahateo ny famatsiana ara-pitaovana ny Fitsarana, satria isan’ny fanafainganana ny raharaham-pitsarana ary fidirana amin’ny fampiasana ny haitao ara-kajy mirindra. Izany dia mitarika fahafaham-po ho an’ny olona manan-draharaha. Marihana fa volam-panjakana madiodio tamin’ny alalan’ny Ministeran’ny Fitsarana no nividianana ireo fitaovana ireo.
Nitondra ny teny fisaorana tamin’ny anaran’ny Mpiara-miasa rehetra teo anivon’ny Fitsarana Ambony, noho izao fahazoana fitaovana izao, ny Lehiben’ny Mpirakidraharaha.