📌Zoma faha – 22 Marsa 2024.
Antsirabe, natolotra ny Fitsarana Ambaratonga Voalohany ny karatra fanarahan-draharaha  » Carnet de Suivi ». Ny Talen’ny Kabinetra, Andriamatoa RARIVOJAONA Emile Andrianirina izay nisolontena ny Minisitry ny Fitsarana dia nanamafy fa tafiditra ao anatin’ny fanatanterahana ny Politikam-panjakana amin’ny ady amin’ny kolikoky sy fanatsarana ny fitantanan-draharaham-panjakana ny fampiasana ny karatra fanarahan-draharaha. Tanjona amin’izany ny fanamorana ny fanatonan’ny Vahoaka ny Fitsarana sy ny fanafoanana ny asan’ny Mpijirika.

✅Tsapan’ny Vahoaka ny fiovana fomba fiasa eo anivon’ny Fitsarana, ary nambaran’izy ireo fa tena manampy betsaka amin’ny olan’ny manan-draharaha ny fampiasana ny karatra fanarahan-draharaha.

⭕Taloha mantsy dia sarotra ho an’izy ireo ny manantona ny Fitsarana eto Antsirabe satria olona avy any ambanivohitra no betsaka manan-draharaha, ka sahirana amin’ny fakan-kevitra sy ny fanarahana ny raharahany.
Marihana fa efa nampiasa « Carnet » ihany ny Fitsarana Ambaratonga Voalohany eto Antsirabe, saingy samy mitondra ny azy ny tsirairay ka mbola sarotra na ny famenoana izany aza. Ity karatra fanarahan-draharaha ity kosa dia mora hampiasaina ary manaraka ny fe-petra ara-tekinika mikasika ny zotram-pitsarana.

⭕Mialohan’ny nampiasana ny karatra fanarahan-draharaha dia nazavaina tamin’ny Mpiasan’ny Fitsarana eto Antsirabe ny fomba fampiasana azy sy ny voarakitra ao anatiny. Nitondra ny fanazavana ny Talen’ny Kabinetran’ny Minisitry ny Fitsarana sy ny Talen’ny firaketan-draharaha, notronon’ny Filohan’ny Fitsarana Ambaratonga Voalohany eto Antsirabe.

📌Nanomboka ny faha-19 Febroary 2024 ka hatramin’ny faha-19 Marsa 2024 dia Sekoly miisa 51 no voatsidiky ny Minisiteran’ny Fitsarana. Sekoly ao anatin’ny Faritra Analamanga izy ireo, ary ny fanentanana mikasika ny ady atao amin’ny fidorohana sy fitsindronana zava – mahadomelina no votoatin’ny fitsidihana. Mpianatra miisa 31.678 no voakasiky ny fanentanana sy fandresen-dahatra. Nampitaina tamin’izy ireo ny voka-dratsin’izany eo amin’ny fahasalaman’ny vatan’ olombelona, ny olana haterany eo anivon’ny Fianakaviana sy ny Fiaraha-monina. Nampahafantarina azy ireo ny sazy miandry ny Mpidoroka sy ny Mpitsindrona zava-mahadomelina sy ny Mpivarotra azy.
Nampiseho ny Mpianatra ny endriky ny karazana rongony.

Izao hetsika izao dia natao hampandraisana andraikitra ny Mpianatra manoloana ny ambana mananontanona , indrindra ho an’ny tanora.

📌Zoma faha-15 Marsa 2024.
Fonjan’i Toliara, nijery ny zavamisy iainan’ny Voafonja ny Mpitahiry ny Tombokasem-panjakana, Minisitry ny Fitsarana. Nandritra izany no nilazany fa
tsy maintsy hampitomboina ny fanofanana ny Voafonja. Izany dia mba ho fanamafisana ny fanarenana ny fiainan’izy ireo, rehefa tapitra ny sazy. Ary ho fanatanterahana ny politikam-panjakana dia ny fanomezan-danja ny mahaolona.

⭕Nohamafisiny fa fanofanana mivelatra amin’ny sehatra maro no hampanaovina ny Voafonja ka tsy maintsy mametraka fiaraha-miasa amin’ny karazam-pikambanana matianina ny tompon’andraikitry ny Fonja. Ao anatin’izany ny fiaraha-miasa amin’ny tompon’andraikitra eo anivon’ny Minisiteran’ny Fampianarana Tekinika sy Fanofanana arak’asa. Ho tan-tsoroka amin’izany dia nanolotra fitaovana ho enti-miofana ny Minisitry ny Fitsarana. Nahitana lafaoro miaraka amin’ny kojakoja fanaovana mofomamy, milina fanjairana miaraka amin’ny kofehy sy valonan-damba, fitaovana fidiovana, koveta sy fandokoana trano ary sakafo.

➡️Raha ny eto amin’ny Fonjaben’ny Toliara, 837 no isan’ny Voafonja. Lehilahy ny 787, 25 no isan’ny Vehivavy, 25 Zaza tsy ampy taona ka zazalahy ny 22 ary 3 kosa ny zazavavy.

📌Zoma, faha-15 Marsa 2024.

Toliara, tapitra ny telo andro nanatanterahana ny Fihaonamben’ny Lehiben’ny Sampam-pitsarana misahana ny ady ifanaovan’ny samy olon-tsotra  » Journée des Chefs de Juridictions Judiciaires ». Ny avy amin’ny Fitsarana Ambony anatin’ny Faritanin’i Toliara sy Fianarantsoa no niatrika izany. Maro ny teboka novelabelarina, nanaovana adihevitra ary nifanakalozana traikefa. Nandray anjara tamin’io fihaonambe io ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana ary namarana izany tamin’ny fomba ofisialy ka nilaza fa nisy ny fiaraha-mientana sy fahavononana hanatanteraka ny Politika ankapoben’ny Fanjakana dia ny fanatsarana ny fitantanana ny raharaham-panjakana, ny fanandratana ny maha olona ary ny ady amin’ny kolikoly.

⭕Hamafisina ny fampiharana ny « Politique pénal », hatsaraina ny fiaraha-miasa amin’ny Zandary sy ny Polisy miandraikitra famotorana. Asa miandry ny tsirairay ny fampiharana ny fehin-kevitra noraisina mba hahatratrarana ny tanjona kendrena. Marihana fa ny fiaraha-miasa teo amin’ny Minisiteran’ny Fitsarana sy ny PNUD no nentina nanatontosa ity Fihaonamben’ny Lehiben’ny Sampam-pitsarana misahana ny ady ifanaovan’ny samy olon-tsotra, izay natao teto Toliara ity.

📌Alakamisy, faha 14 Martsa 2024, Toliara.
Teto amin’ny FJKM Rasalama Martiora Toliara. Niara-niombom-bavaka tamin’ny Kristianina ny Mpitahiry ny Tombokasem-panjakana, Minisitry ny Fitsarana, Ramatoa RANDRIAMANANTENASOA Landy Mbolatiana sy ny mpiara-miasa aminy. Tao anatin’ny fandaharam-potoanan’ny fanapariahana lalàna, mba ahafahan’ny Kristiana mahafantatra ny lalàna manan-kery sy mandray andraikitra manoloana izany.

⭕Nanokatra ny famelabelarana ny Ministra, Ramatoa RANDRIAMANANTENASOA Landy Mbolatiana, izay Mpitoriteny rahateo raha ny eo amin’ny sehatry ny Fiangonana, ka ny voalazan’ny Salamo 119 : 16 no nitondrany ny fanazavany.

➡️Taorian’izay dia nifandimby nanazava fehezan-dalana ny Mpiara-miasa amin-dRamatoa Minisitra ka lalàna roa izay mahakasika ny tontolon’ny Fiarahamonina no nampahafantarina dia ny lalàna vaovao laharana faha 2024-001 tamin’ny 26 Febroary 2024 manova sy manitsy ny Fehezan-dalàna famaizana momba ny fanolanana, sy ny lalàna mifehy ny Fianakaviana ka notsongaina manokana ny momban’ny tolotra na « donation » sy ny fandovana.

➡️Nazavaina ny lalàna vaovao sy ny lalan-kevitra nahatonga ny Fanjakana nanavao ny lalana mikasika ny fanolanana. Ho fiarovana ny ankizy eo anatrehan’ny fahapotehan’ny fiainany no isan’ny tena antony. Nomena ny famaritana ny atao hoe fanolanana sy ny sazy izay mihatra amin’ireo mpanolana araka ny lalàna vaovao.
Novelabelarina ihany koa ny fepetra arahina mba ho ara-dalana tsara ny tolotra izay ifanaovan’ny olona ary nampahafantarina ihany koa ny fepetra ahafahan’ny olona iray mandova.

⭕Taorian’izay dia nozaraina takilakely mirakitra izany lalàna momban’ny tolotra sy ny fandovana izany ireo Kristiana tonga tao. Nanomana izao fihaonana izao ny Foibe FJKM. Nanotrona ny fihaonana kosa ny Solotenan’ny FFKM eto Toliara, nahitana ny EKAR, FLM, ANGLIKANA, FJKM, ary teo ihany koa ireo mpivavaka avy amin’ny fiangonana rahavavy hafa.