Mois : mars 2024

📌Alakamisy, faha 14 Martsa 2024, Toliara.
Teto amin’ny FJKM Rasalama Martiora Toliara. Niara-niombom-bavaka tamin’ny Kristianina ny Mpitahiry ny Tombokasem-panjakana, Minisitry ny Fitsarana, Ramatoa RANDRIAMANANTENASOA Landy Mbolatiana sy ny mpiara-miasa aminy. Tao anatin’ny fandaharam-potoanan’ny fanapariahana lalàna, mba ahafahan’ny Kristiana mahafantatra ny lalàna manan-kery sy mandray andraikitra manoloana izany.

⭕Nanokatra ny famelabelarana ny Ministra, Ramatoa RANDRIAMANANTENASOA Landy Mbolatiana, izay Mpitoriteny rahateo raha ny eo amin’ny sehatry ny Fiangonana, ka ny voalazan’ny Salamo 119 : 16 no nitondrany ny fanazavany.

➡️Taorian’izay dia nifandimby nanazava fehezan-dalana ny Mpiara-miasa amin-dRamatoa Minisitra ka lalàna roa izay mahakasika ny tontolon’ny Fiarahamonina no nampahafantarina dia ny lalàna vaovao laharana faha 2024-001 tamin’ny 26 Febroary 2024 manova sy manitsy ny Fehezan-dalàna famaizana momba ny fanolanana, sy ny lalàna mifehy ny Fianakaviana ka notsongaina manokana ny momban’ny tolotra na « donation » sy ny fandovana.

➡️Nazavaina ny lalàna vaovao sy ny lalan-kevitra nahatonga ny Fanjakana nanavao ny lalana mikasika ny fanolanana. Ho fiarovana ny ankizy eo anatrehan’ny fahapotehan’ny fiainany no isan’ny tena antony. Nomena ny famaritana ny atao hoe fanolanana sy ny sazy izay mihatra amin’ireo mpanolana araka ny lalàna vaovao.
Novelabelarina ihany koa ny fepetra arahina mba ho ara-dalana tsara ny tolotra izay ifanaovan’ny olona ary nampahafantarina ihany koa ny fepetra ahafahan’ny olona iray mandova.

⭕Taorian’izay dia nozaraina takilakely mirakitra izany lalàna momban’ny tolotra sy ny fandovana izany ireo Kristiana tonga tao. Nanomana izao fihaonana izao ny Foibe FJKM. Nanotrona ny fihaonana kosa ny Solotenan’ny FFKM eto Toliara, nahitana ny EKAR, FLM, ANGLIKANA, FJKM, ary teo ihany koa ireo mpivavaka avy amin’ny fiangonana rahavavy hafa.

📌Toliara 13 Marsa 2024.

Tanterahana eto Toliara ny Fihaonamben’ny Lehiben’ny Sampam-pitsarana misahana ny ady ifanaovan’ny olon-tsotra na «Journées des Chefs des Juridictions Judiciaires».
Nanokatra izany tamin’ny fomba ofisialy ny Mpitahiry ny Tombokasem-panjakana, Minisitry ny Fitsarana, Ramatoa RANDRIAMANANTENASOA Landy Mbolatiana.
Nambarany fa tafiditra hatrany anatin’ny Politika ankapoben’ny Fanjakana momba ny Fitsarana izao fihaonambe izao, izay miantefa amin’ny fanomezan-danja ny maha-olona sy ny Fanjakana tsara tantana ary ny ady amin’ny kolikoly. Hampiasaina ny fomba rehetra ho entina manatanteraka izany, antony namerenana izao fikaonan-doha mivelatra ho an’ny Lehiben’ny sampam-pitsarana misahana ny ady ifanaovan’ny olon-tsotra na « Journées des Chefs des Juridictions Judiciaires » izao.

➡️Tanjona ny fanatsarana ny kalitaon’ny asam-pitsarana atolotra ny Vahoaka manan-draharaha sy ny fanatevenana ny fanafainganana ny raharaham-pitsarana ary ny fanamafisana ny traikefan’ireo Lehiben’ny Sampam-pitsarana amin’ny fomba fitantanany ny Fitsarana. Lohahevitra maro araka izany no dinihana ao anatin’ny telo andro, anisan’izany ny fifampitana traikefa eo amin’izy ireo.

⭕Niato an-taonany maro izao fihaonambe izao ka amin’izao famerenana azy izao dia ireo Lehiben’ny sampam-pitsarana rehetra eo anivon’ny Fitsarana Ambony eto Toliara sy any Fianarantsoa no nanombohana azy. Manatrika izany ny Mpitahiry ny Tombokasem-panjakana, Minisitry ny Fitsarana, Ramatoa RANDRIAMANANTENASOA Landy Mbolatiana, miaraka amin’ireo Lehiben’ny Fitsarana Tampony sy ireo Tompon’andraikitra isan-tsokajiny eo anivon’ny Ministeran’ny Fitsarana. Manohana ara-bola sy ara-pitaovana izao fihaonana izao ny PNUD.

Zoma, faha 08 Martsa 2024, tao amin’ny Fonjan’i Toamasina, nijery ny vokatry ny fanofanana nomena ny Voafonja ny Mpitahiry ny Fitombokasem- panjakana, Minisitry ny Fitsarana RANDRIAMANANTENASOA Landy Mbolatiana.

Nandritra izany no nahafantarana fa, efa betsaka ireo mpanjifa ny asa tanan’ny Voafonja ary tsy ny Malagasy ihany fa hatramin’ny teratany vahiny.

Misy ireo mividy ny asa tanana efa vita, misy ihany kosa ireo mampanao manaraka ny endrika ilainy.
Ny vola azo amin’izany dia ho entina manatsara ny fitaovana sy ireo akora hampiasaina, ary misy am- pahany homena izay Voafonja nanao ny asa tanana mba hanomanan’izy ireo ny ho aviny.

Ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA Landy Mbolatiana dia nilaza fa tsy maintsy hampitomboina hatrany ny traikefan’ireo Voafonja mandalo fiofanana. Nanome fitaovana hanatanterahana izany izy ary nisaotra ny Mpampiofana sy ny Mpanohana ara-bola sy ara-tekinika nohon’ny fandraisan’ andrakitra miaraka amin’ny Ministeran’ny Fitsarana mikasika ny asa fanarenana ara-tsaina, ara-tsosialy ary ara-pihariana ho an’ ireo rehetra manala sazy eto amin’ny Fonjan’i Toamasina.

Zoma, faha 08 Martsa 2024, tao amin’ny Fonjan’i Toamasina, tonga nanamarika ny andron’ny Vehivavy, niaraka tamin’ny Voafonja, ny Mpitahiry ny Fitombokasem-panjakana, Ministry ny Fitsarana RANDRIAMANANTENASOA Landy Mbolatiana.

⚙️ Nandritra izany no namelabelarany ny politikam- panjakana mikasika ny fanomezan-danja ny maha- olona. Ao anatin’ny fanatanterahana izany ny fanatevenana ny fanofanana ny Voafonja, izay sady fanomanana ny famerenana azy ireo eny anivon’ny fiarahamonina no fanamafisana ny ady amin’ny fahantrana.

Ho tan-tsoroka amin’izany dia nanolotra fitaovana ho an’ny Fonja tao Toamasina ny Ministry ny Fitsarana. Izany dia nahitana milina fanjairana, miaraka amin’ny kofehy, hety, valonan-damba, Lafaoro, lafarinina, siramamy, koveta, fitaovana fanaovam-bolo. Ankoatr’izay dia nisy ny fizaràna sakafo nohon’ny fankalazana ny andron’ny Vehivavy.

Nilaza ny solotenan’ny Voafonja nandray fitenenana fa velom-panantenana izy ireo satria izay vao nisy Ministra nanamarika ny andron’ny Vehivavy niaraka tamin’ny Voafonja, ary nitondra fananarana sy fankaherezana ho azy ireo.

Tetsy ankilan’izay, ny Minisitry ny Fitsarana RANDRIAMANANTENASOA Landy Mbolatiana dia nisaotra ny Mpiara-miasa sy ny Mpiara-miombon’ antoka, na ny Fikambanana isan-tsokajiny eto Madagasikara sy any ivelany izany, na ny Mpitondra Fivavahana, nohon’ny tan-tsoroka entin’izy ireo amin’ny Fanarenana ara-tsosialy ho an’ny Voafonja.

Raha ny eto Toamasina dia miisa dimy ny Lefitry ny Lehiben’ny Fonja ka Vehivavy ny telo amin’izany.
Miisa 60 kosa ny Vehivavy Voafonja ka iray amin’izy ireo no tsy ampy taona.

Alakamisy faha -07 Febroary 2024, teto Toamasina, nilaza ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA Landy Mbolatiana fa izay rehetra voaheloka amin’ny fanolanana dia iharan’ny sazy avokoa.

Efa vonona ny hampihatra ny famosirana ny Mpitsara, efa betsaka mantsy ireo zaza tsy manan-tsiny lasibatra nohon’ny fanolanana, ao ireo mitondra takaitra mandra-pahafaty, ao ireo niteraka zaza tsy niriana, misy ihany koa no maty mihintsy, toy ilay tranga nisy tao Toamasina.

Marihina fa ny 26 Febroary lasa teo no efa nahazo ny fankatoavana avy amin’ny Filoham-pirenena ny Fehezan-dalàna famaizana mikasika ny fanolanana ary mihatra avy hatrany.