Mois : octobre 2023

FONJABEN’ANTANIMORA, NOTOLORANA MARI-PAHAIZANA IREO VOAFONJA VEHIVAVY.

📌Alakamisy 19 octobr 2023 – nanolotra mari-pahaizana na « attestations aux lauréates de la 1ère promotion » ho an’ireo voafonja vehivavy eto amin’ny Fonjaben’Antanimora izay nahavita fampiofanana momba ny zaitra sy fanamboarana « serviettes hygieniques reutilisables » ny avy amin’ny « Douleurs Sans Frontières Madagascar » àmin’ny alalan’ny tetikasa Mikolo Aina sy ny FANARENANA, ary nampian’ny Ministèran’ny Fampianarana Teknika sy Fanofanana arak’asa sy ny Ministeran’ny Fitsarana.

✔️ Ny tanjona amin’izao dia fanomanana ireo voafonja hiverina eny anivon’ny fiaraha-monina ary mba tsy ho vesatra fa hanana asam-pivelomany.
Izao fanofanana izoa moa dia tohanan’ny AFD na « Agence Française de Développement ».

FANATSARANA NY FOMBA FIASA SY FANAFAINGANANA NY RAHARAHAM-PITSARANA: NANAO ATRIKASA TETO ANTSIRABE NY MINISTRY NY FITSARANA.

📌Alakamisy faha-19 Oktobra 2023, teto amin’ny Fitsarana Ambaratonga Voalohany Antsirabe. Nitarika ny atrikasa ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA Landy Mbolatiana. Nandray anjara tamin’izany kosa, ireo rehetra mikirakira ny raharaham-pitsarana, ny Mpitsara, ny Mpirakidraharaha, ny Mpandraharahan’ny Fonja ary ny Mpiasa tsotra.

✅Nodinihana tamin’izany ny mikasika ny Fitsarana ady heloka sy ady madio, ka notombanana ny zava-misy sy ny fomba fiasa hatramin’izay, navoaka avokoa ny olana nosedraina teo am-panatanterahana ny asa, izany rehetra izany dia naravona ka nitadiavam-bahaolana mba hanafainganana bebe kokoa ny raharaham-pitsarana. Voakasika amin’izany ny raharaha ady tany sy mikasika ireo olona voatana vonjimaika any am-ponja, ary hampiharina eto Antsirabe ny paikady efa natao dia ny fizarana ireo raharaha amin’ny Mpitsara Mpamoaka didy. Torak’izany ihany koa ny Fitsarana ady heloka. Tanjona mantsy ny hampakarana ny tahan’ny voafonja voatsara, ary fampidinana ny tahan’ny voafonja tsy voatsara araka ny fenitra Iraisam-pirenena. ⭕Ankoatr’izay dia nomena fiofanana momban’ny fitantanam-bola ireo mpiandraikitra izany eo anivon’ny Fitsarana Ambaratonga Voalohany eto Antsirabe.

➡Ny fanatanterahana ity atrikasa ity dia tafiditra ao anatin’ny fanitarana ny politikam-pitantanana napetraky ny Minisitra RANDRIAMANANTENASOA Landy Mbolatiana, dia ny Fitsarana tsara tanana, tsy mitanila ary manakaiky vahoaka.

🎥 Indro arahina eto ny fanazavana nentin’ny Minisitry ny Fitsarana RANDRIAMANANTENASOA Landy Mbolatiana, mahakasika ireo teboka nodinihina nandritra izany atrik’asa izany.

FITSARANA AMBONY : NAPETRAKA AMIN’NY TOERANY NY FILOHA VOALOHAN’NY FITSARANA.NANATRIKA NY LANONAM-PITSARANA NY MINISTRA RANDRIAMANANTENASOA LANDY MBOLATIANA.

📌Alatsinainy faha -16 Oktobra 2023, teto amin’ny Fitsarana Ambony Antananarivo. Napetraka amin’ny toerana maha – Filoha Voalohany eo anivon’ny Fitsarana Ambony Ramatoa LIVAHARISOA RAKOTOMANGA Liliane, lanonam-pitsarana manetriketrika, natrehan’ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA Landy Mbolatiana.

➡Ny Filoha Voalohany eo anivon’ny Fitsarana Ambony no Lehiben’ny Mpitsara Mpamoaka didy. Novelabelariny ny lanjan’ ny fampakarana Fitsarana Ambony, izay rafitra ahazoana mitondra raharaha raha toa ka tsy mahafa-po ny olona manan-draharaha ny didy nivoaka teo anivon’ny Fitsarana Ambaratonga Voalohany.

✅Vinan’asany ny fanatsarana ny fomba fiasa eo anivon’io sampam-pitsarana io, ao anatin’izany ny fanafainganana ny raharaham-pitsarana, indrindra ny ady tany, mifanindran-dalana amin’izany ny fanafainganana ny Fitsarana ady madio, eo koa ny fampakarana ny tahan’ny voafonja voatsara raha oharina amin’ny voafonja tsy voatsara, ho an’ny ady heloka, hamafisiny ihany koa ny fiaraha-miasa amin’ny Mpisolovava ka hisy ny atrikasa iarahan’ny roa tonta. Izany rehetra izany dia ao anatin’ny ny politikam-pitantanana napetraky ny Minisitra RANDRIAMANANTENASOA Landy Mbolatiana.

⭕Taorian’ny lanonam-pitsarana manetriketrika no nanazavan’ny Minisitry ny Fitsarana ny fanontanian’ny Mpanao Gazety mikasika ny famindran-toerana ny Mpiandry Fonja, nambarany fa toy asam-panjakana rehetra dia misy ny fandamina, mba ho fanatsarana ny fomba fiasa, tsy midika ho sazy arak’izany ny famindran-toerana. Nanatrika ny lanonana teto amin’ny Fitsarana Ambony ireo Minisitry ny Fitsarana teo aloha, ny Mpisolovava ary ireo mpisehatra amin’ny raharaham-pitsarana.

🎥 Taorian’ny fanatrehana izany lanonam-pitsarana izany dia nitafa tamin’ny Mpanao gazety tonga teny an-toerana ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA LANDY MBOLATIANA.

📌 Notanterahina ny Alakamisy 12 oktobra 2023 ny fanolorana solosaina sy fitaovana avy amin’ny tetik’asa PAJMA ho an’ireo fitaleavana sy sampana maro eo anivon’ny Ministeran’ny Fitsarana.

➡Ity tetik’asa ity moa dia nanomezan’ny AFD famatsiana vola mitentina 5.000.000 euros nohon’ny tsy fahampiana ara-bola eo anivon’ny ministera, araka ny lahateny nataon’ny Mpandrindra ny tetik’asa.

✅Anisan’ny nisitraka izany fitaovana sy solosaina izany ny BCCJEP, DGPR, DGAP, DAFP, PRMP, SPP, CODIS-AP, DRP, ny DRAP Atsinanana. Fa ny FJPA no nahazo ampahany betsaka amin’izany mba hahafahana manantateraka ny fanangonana ireo lamandy eny amin’ny fitsarana ka mba hananana loharanom-bola sy fahaleovantena ara-bola ary indrindra indrindra ho fampiharana ny maha tany tan-dalàna an’i Madagasikara.

⭕ Mbola nanamafy izany ny Mpitahiry ny Fitombokasem-panjakana, Ministry ny Fitsarana, Ramatoa Landy Mbolatiana RANDRIAMANANTENASOA. Nankasitraka ny PAJMA tamin’ireo famatsiana sy fiaraha-miasa maro efa nisy teo amin’ny roa tonta izy, ary misaotra tamin’ny fampitaovana ny ministera izay iandraiketany, satria dia ao anatin’ny tsy fahampiana tokoa ny ministera noho izany dia tsara fahatongavana ireo fanohanana ara-pitaovana ireo. Mitondra ainga vao ho an’ny asam-pitsarana izany. Manantena ny fitohizan’ny fiaraha-miasa hatrany izy amin’ny alalan’ny PAJMA2.

📍 Ireto avy ireo fitaovana natolotry ny PAJMA :
– Photocopieurs performants : 2
– Imprimante multifonction : 8
– Imprimante Laser : 2
– Ordinateurs de bureau : 34
– Ordinateurs portable : 7
– Onduleurs : 34
– Stabilisateurs : 21

📌Talata 10 oktobra 2023, tonga nitsidika ny Mpitahiry ny Fitombokasem-panjakana, Minisitry ny Fitsarana, Ramatoa RANDRIAMANANTENASOA Landy Mbolatiana teto Faravohitra ny Mpanolo-tsaina manokana mikasika ny zon’olombelona ao amin’ny Firenena Mikambana, Ramatoa Sabine LAUBER ary nitondra ny tatitra voarainy tamin’ny Mpitondra teny avy any Genève.

⭕Nifampiresahana tamin’izany ny momba ny fiainam-pirenena sy ny mahakasika ny fanajana ny zon’olombelona amin’izao fotoam-pifidianana izao. Voaresaka tao ihany koa ny Lalàna momba ny zom-pirenena, ny fandavan’ny Filohan’ny Antenimieran-doholona handray ny andraikitra maha filoham-pirenena mpisolo-toerana azy ary ny fahafahana manao fampielezan-kevitra ankalalahana.

➡Nanazava Ramatoa Minisitra fa araka ny fanapahan-kevitra laharana 12-HCC/D3 tamin’ny 9 septambra 2023 dia ny Governemanta ifarimbonana no mitantana ny Firenena taorian’ny fametraham-pialan’ny Filoham-pirenena izay nilatsaka ho fidiana.

📍Marihana fa araka ny andininy 120 ao amin’ny Lalàmpanorenana dia tsy azo ivalozana ny didim-pitsarana sy ny fanapahana navoakan’ny Fitsarana Avo momba ny Lalàmpanorenana.
Mahakasika ny fampielezan-kevitra dia nohamafisiny ny fahafahan’ny Kandidà manao famoriam-bahoaka ankalamanjàna na an-dalambe ankalalahana, saingy ilaina ny fanambarana mialoha, an-tsoratra, any amin’ny solontenam-panjakana mahefa eo an-toerana araka ny andininy 97 ny Lalàna Fehizoro laharana faha 2018-008 tamin’ny 11 may 2018 mikasika ny fitondrana ankapobe ny fifidianana sy ny fitsapan-kevi-bahoaka.