Mois : décembre 2022

⭕ Notontosaina androany Sabotsy, 10 desambra 2022 teo amin’ny Parvis Analakely ny lanonana manetriketrika nankalazana ny fitsingerenan’ny daty nanaovana ny « fanamnbarana iraisam-pirenena momba ny zo’olombelona » na ny « Déclaration Universelle des Droits de l’Homme », 10 desambra 1948.
Ny Ministeran’ny Fitsarana, sy ireo mpiara-mientana eo amin’ny sehatry ny Zon’olombelona mahaleo tena sy tsy miankina amin’ny Fanjakàna sy ireo rafitra eo anivon’ny Firenena Mikambana sy ny fikambanana mampivondrona ny firenena miteny sy mampiasa ny teny frantsay miasa sy monina eto Madagasikara no niaraka nankalaza ny faha 74 taona.

📌 Lohahevitra nosafidin’ny Firenena mikambana tamin’ity taona ity dia ny
« FAHAMENDREHANA, FAHAFAHANA ARY FAHAMARINANA HO AN’NY REHETRA ».

📌 Ho an’I Madagasikara manokana kosa dia nosafidina ny lohahevitra miompana amin’ny ffiarovana ny zon’ny olona voan’ny albinisme.
Nanamarika ny fankalazana ny fifandimbiasam-pitenenan’ireo olomanankaja tonga nasaina ka isan’izany ny solontenan’ny fiaramonim-pirenena, Ramatoa Sabine LAUBER, Mpanolo-tsaina voalohany amin’ny zon’olombelona, Andriamatoa Issa SANOGO, Mpandrindra maharitra ny Firenena Mikambana eto Madagasikara, ary Andriamatoa RAKOTOZAFY François, Mpitahiry ny fitombokasem-panjakana, Ministry ny Fitsarana.
Tao anatin’ny lahateniny no nanambaran’Andriamatoa Minisitra fa firenena mandala ny zon’olombelona i Madagasikara ary efa maro ny dingana vita amin’ny fanajana sy fiarovana ary fampiroboroboana izany eto amin’ny firenena. Nilaza ihany koa ny tenany fa tomponan’andraikitra ny olom-pirenena tsirairay amin’ny fanajana ny zon’olombelona”.
Isan’ny nanamarika ny fankalazana ihany koa hy famelabelaran-kevitra narahim-panentanana momba ny zon’ireo olona voan’ny albinisme, nataon’Andriamatoa TOMBOHAVANA Fabien, lehiben’ny sampandraharaha misahana ny zon’olombelona eo anivon’ny Ministeran’ny Fitsarana.

📌 Noravahana fampisehoana slam sy hiragasy ny lanonana, izay niompana bebe kokoa tamin’ny fanentanana ny olona ny amin’ny tokony hiarovana ireo olona voan’ny albinisme.

📌 Ankoatr’ireo dia nisy fizarana loka ho an’ireo olona 9 nahazo voalohany tamin’ny fifaninana isankarazany momna ny zon’olombelona izay nokarakarain’ny UNESCO sy fizarana certificats ho an’ireo mpikambana ao amin’ny Comité de Rédaction des Rapports nationaux des Droits de l’Homme miisa 33 izay vao avy nanaraka fiofanana manokana niarahana tamin’ny Bureau du Haut Commissariat des Nations Unies eto Madagasikara.

📌 Araka izany dia manamafy ny Ministeran’ny Fitsaràna fa zava-dehibe ny zon’olombelona, ary tokony harovana sy hajaina. Ary manentana ihany koa ny amin’ny fiarovana ireo olona voan’ny albinisme. Andraikitry ny rehetra izany, satria olona iray ihany isika , na dia tsy mitovy loko sy endrika aza.
Nofaranana tamin’ny fitsidihana ireo trano heva maro ny lanonana.

⭕ Miezaka hatrany ny Ministeran’ny Fitsarana manatsara ny fomba fiasa, ka miroso tsikelikely amin’ny fanavaozana ny fitantanana sy ny fikirakirana amin’ny fampiasana ny haitao ara-kajy Mirindra. Voakasik’izao atrikasa izao manokana ny raharaha ady madio mba ho fanafainganana ny raharaham-pitsarana ary indrindra hiadiana amin’ny kolikoly. Ho voarakitra sy ho voahara-maso avokoa ny fikirakirana rehetra izay atao.
Vatsian’ny USAID sy PNUD vola amin’ny alalan’ny tetikasa « RINDRA ». Raha ny tetiandro dia afaka enim-bolana no afaka hampiasaina eny anivon’ny Fitsarana ny « LOGICIVIL » .

🎥🎤 Mitondra fanazavana ny Sekretera Jeneralin’ny Fiadidiana ny Repoblika sy ny Sekretera Jeneralin’ny Ministeran’ny Fitsarana.

📌 Fanafainganana ny raharaham-pitsarana ary ihany koa hiadiana amin’ny kolikoly no tanjona napetraka.

⭕ Tanterahina ao amin’ny World Forum Convention Center ao La Haye, renivohitr’i Pays-Bas nanomboka ny 5 hatramin’ny 10 desambra 2022 ny Fivoriambe iraisan’ireo firenena mpikambana ao amin’ny Fitsarana Ady Heloka Bevava Iraisam-pirenena (Assemblée des Etats Parties au Statut de Rome de la Cour Pénale Internationale).
📍 Nisolo tena ny Firenena Malagasy Atoa Omer BERIZIKY, Lehiben’ny Masoivohon’i Madagasikara ao Bruxelles sy ny mpiara-miasa aminy, Atoa RAKOTONAVALONA Ranary Robertson, Filoha Voalohan’ny Fitsarana Tampony sy BELALAHY Hanitriniaina, Tale miandraikitra ny zon’olombelona sy ny fifandraisana iraisam-pirenena.
📍 Araka ny tatitra nataon’ny Filoha sy ny Mpampanoa lalàna ao amin’ny CPI dia niakatra ambony dia ambony ny isan’ny raharaha sahanin’ny CPI ary nanaovana famotorana tamin’ity taona 2022 ity. Noentanina ny firenena mpikambana mba hifanampy amin’izy ireo ary hamita ny adidy ara-bola tokony aloany avy.
📌 Ny 6 desambra no nandray fitenenana ny solon-tena Malagasy. Nisongadina tao anatin’ny lahateniny ny fankasitrahana ireo mpitarika nandritra izay 20 taona nisian’ny CPI izay. Nohamafisina fa Madagasikara dia mametraka ho lohalaharana ny fandriam-pahalemana sy ny fahamarinana ary ny fanajana ny lalàna anisan’izany ny lalàna iraisam-pirenena. Vonona hatrany hiara-miasa amin’ny CPI sy ireo firenena mpikambana i Madagasikara mikasika ny fanajana sy ny fiarovana ny zon’olombelona, ny fanajana ny tany tan-dalàna, ny ady amin’ny kolikoly sy ny endrika fanavakavahana isan-karazany.
📌Anisan’ireo firenena tsy ampy solon-tena na tsy manana solon-tena ao amin’ny CPI isika malagasy ka amporisihana ny tera-tany Malagasy handray anjara amin’ny tolotr’asa amin’io sehatra io.

🇲🇬 ⚖ Fanatanterahana ny fananganan-tsaina natao teto amin’ny Fitsarana Tampony Anosy, notarihin’ny Sekretera Jeneralin’ny Ministera, Ramatoa RABY Savatsarah.