Mois : novembre 2020
Fiaraha-miasa ivelany amin’ny Fitsarana
TONGA NITSIDIKA TETO FARAVOHITRA NY MASOIVOHON’I MAORISY SY NY SOLONTENAN’NY PNUD
Olo-manan-kaja roa sosona no tonga nitsidika amim-panajana androany ny Mpitahiry Fitombokasem-panjakana, Minisitry ny Fitsarana Atoa Johnny Richard Andriamahefarivo. Voalohany ny Masoivohon’ny Nosy Maorisy Rtoa Marie Noëlle Françoise Labelle. Nanaraka azy ny Mpisolotena maharitra an’ny Fandaharan’asan’ny Firenena Mikambana ho an’ny Fampandrosoana (PNUD) eto Madagasikara, Rtoa Natasha Van Rijn.
FIARAHA-MIASAN’NY FITSARANA MALAGASY SY MAORISIANINA
Fotoana sisa andrasana. Tanjona ny hisian’ny fifanarahana eo amin’i Madagasikara sy Maorisy amin’ny lafiny Fitsarana. Efa vonona sy nampitaina eo anivon’ny Filan-kevitry ny Governemanta sy ny Filan-kevitry ny Minisitra ny antotan-taratasy rehetra. Ireo no manapaka sy tompon’ny teny farany dia miroso ny fanaovan-tsonia, toy ny efa misy sy iraisana amin’ireo firenena hafa.
« An-dalam-panatanterahana io fifanarahana io, izay mbola tsy misy hatreto eo amin’ny firenena roa tonta. Mila dinika lalina mba tsy ho sanatria resaka politika sy tsy fanajana ny fahaleovantenan’ny firenena roa tonta. Misy ohatra teratany malagasy tsaraina any Maorisy, misy koa teratany Maorisianina tsaraina eto Madagasikara. Ohatra ny raharaha famoahana volamena avy eto. Misy koa ny hoe mandalo fotsiny ao. Ny famerenana an’ireny harem-pirenena ireny eto amintsika, ny sambo mijanona eo anelanelan’ny fari-dranomasina iraisana : dinikasa no natao androany momba ireny. Tandrovana ny fiandrianam-pirenena sy ny lalàna manan-kery misy amin’ny firenena tsirairay avy » hoy ny Mpitahiry Fitombokasem-panjakana, Minisitry ny Fitsarana Atoa Johnny Richard Andriamahefarivo.
HITOHY NY FIARAHA-MIASA SY NY FANAMPIANA
Ho an’ny Fandaharan’asan’ny Firenena Mikambana ho an’ny Fampandrosoana (PNUD) eto Madagasikara kosa indray, dia tafiditra indrindra ao anaty fanamafisana sy fanatsarana ny efa nisy.
« Raha izay tomban’ezaka vita nandritra izay 11 volana naha-teto ny tena izay dia nanampy betsaka tokoa ny PNUD. Niompana indrindra amin’ny programan’ny Firenena Mikambana amin’ny fanatsarana ny tontolon’ny asam-pitsarana na eo anivon’ny fandraharahana ny fonja, na eo anivon’ny fampandehanan-draharaham-pitsarana amin’ny ankapobeny. Fiaraha-miasa, fifanentanana, ; fivoriana, fikarakarana , famporisihina amin’ny fanomezana fitaovana izay ilaina, ny ho an’ny fonja ohatra farany teo ny ady amin’ny Covid-19, fanomezana fanampiana, fitaovana, fanafody, fampandehanan-draharaha, fanara-hamaso, fikojakojana, sns. Tena nanampy betsaka tokoa ny PNUD ary naneho ny fahavononany ny mbola hanao misimisy kokoa » hoy ny Mpitahiry Fitombokasem-panjakana, Minisitry ny Fitsarana Atoa Johnny Richard Andriamahefarivo.
Pôle Anti-Corruption
APPEL A CANDIDATURES POUR LE POLE ANTI-CORRUPTION DE MAHAJANGA et de FIANARANTSOA
Fitsarana miady amin’ny VBG
ENTANINA NY VAHOAKA HITOROKA NY MPANOLANA
Roso ity ka tsa mipody koa.
Ho hitam-poko sy ho hitam-pirenena ny vokatra. Asakasak’izay mbola sahy hanana eritreri-dratsy sy fomba fanao amin’ny heloka fanolanana amin’ny endriny rehetra, na ny herisetra atao amin’ny maha-lahy na maha-vavy (Violences Basées sur le Genre) na VBG. Herinandro monja tao aorian’ny fanambarana goavana nataon’ny Mpitahiry ny Fitombokasem-panjakana sy Minisitry ny Fitsarana (GSMJ), Atoa Johnny Richard Andriamahefarivo, dia efa miasa ny Fitsarana manokana momba ny VBG.
Nisy ny fivoriana androany maraina natao tao amin’ny Fitsarana an-tampony (Cour Suprême) Anosy, natrehin’ireo Mpitsara 4 mianadahy manampy ny Tonia Mpampanoa an’ny Fitsarana miady amin’ny VBG, miaraka amin’ireo tompon’andraikitra avy eo anivon’ny Polisim-pirenena sy Zandarimariam-pirenena (OPJ). Lahadinika ny fomba fiaraha-miasa.
Raha ny fanambarana nataon’i Rtoa Rakotomalala Hanitriniaina, dia nivoitra fa vonona tanteraka ny hiara-hiasa ireo avy amin’ny OPJ. Samy hiezaka izany hanatanteraka ireo baiko rehetra hampandehanana ny Fitsarana manokana momba ny VBG. Ankoatra izay, hiezaka hanafaingana ny fitsarana ny raharaha, mikasika ny herisetra atao amin’ny maha-lahy na maha-vavy sy ny fanolanana ny zaza tsy ampy taona, izay tonga aty amin’ny Fitsarana rehetra.
“Lasa manana ny lanjany ary laharam-pahamehana ny resaka herisetra mifototra amin’ny maha-lahy na maha-vavy. Dikany, hanafaingana tanteraka ny raharaha VBG, anisany ny eto anivon’ny Fampanoavana manokana ohatra ny fisian’ny raharaham-pitsarana isan-kerinandro. Tsy miaraka intsony amin’ireo raharaham-pitsaraha hafa rehetra izay mifangaro taloha fa manana ny lanjany manokana satria ho sivanina” hoy Rtoa Andrianalivelo Prisca.
“Ny hafatra avy aminay ho an’ny olona rehetra iharan’ny VBG : sahia miteny, sahia mitoroka, sahia mijoro. Matoa izahay 4 mianadahy ireto natao ho Mpitsara manokana momba io raharaha VBG io dia misy fiofanana manokana atrehanay, efa natrehanay ary mbola mitohy, sy hitohy. Hisy fandraisana manokana anareo mpitory eny anivon’ny OPJ, tonga aty koa dia mbola rafitra sy paikady manokana na procédure toy izay ihany koa no misy, ary hafa tanteraka ny famaizana” araka ny fanazavana nentin-dRtoa Razafy Harivony Vanessa.
Marihina fa Atoa Rajonson Andry Miary no Mpitsara faha-4 manampy ny Tonia Mpampanoa eo anivon’ity Fitsarana manokana miady amin’ny VBG ity.
Fanatsarana ny Fandraharahana ny Fonja
HAHAVELON-TENA IREO TOMBIM-PAMOKARANA MIANKINA AMIN’NY FONJA
Vitsy mpahalala nefa maro ireo tobim-pamokarana miankina amin’ny fonja na “camps pénaux” eto Madagasikara. Tanjona ny hanatsarana ny asam-pamokarana eny anivon’izy ireny mba tsy ho vesatra ho an’ny Ministera mpiahy sy ny Fanjakana intsony ireo voafonja fa hahavelon-tena. Hatreto dia 1.800 ariary isaky ny voafonja isan’andro tokoa mantsy no tetibola natokana ho an’ny sakafo fotsiny, ho an’ireo voafonja miisa 28.000 manerana ny Nosy. Mitentina 19 Miliara ariary isan-taona amin’ny tetibolam-panjakana izany. Maika araka izany ny hanatsarana ny asam-pamokarana mba hahazoana vokatra tsara sy haingana.
Nivoitra ireo androany tamin’ny fanokafana ny atrikasa miompana amin’ny “ Fanadihadiana sy fanatsarana ny tontolon’ny fananan-tany sy ny tombim-pamokarana eo anivon’ny Fandraharahana ny Fonja”, atao mandritra ny 4 andro etsy amin’ny “Le Relais de la Haute Ville” Anjohy. Mpanohana izao atrikasa izao ny tetikasa PAJMA.
Fandraharana ny Fonja
FIOFANANA AMIN’NY FITANTANAM-BOLA
Atrikasa fiofanana momba ny fitantanam-bola no natrehin’ireo « Inspecteur d’Administration Pénitentiaire » (IAP) miisa 21 natao teto Fianarantsoa nandritra ny 4 andro. Avy aty amin’ny tapany atsimon’ny Nosy avokoa ireo Talem-paritra (DRAP) sy tompon’andraikitra eo anivon’ny Fandraharahana ny Fonja, mpandray anjara. Tanjona ny hanamafisana ny traikefa sy fahaiza-manao amin’ny lafiny fitantanam-bola. Mitondra fanazavana Rtoa Talen’ny Fandaharanasa sy Fampitaovana ny Fandraharahana ny Fonja (DPRP) ny IAP Raheriniaina Emma, arahin-dRtoa Andriamampiandra Hasindraibe Christiane, Mpandrindra ny tetikasa PAJMA, izay manohana ny fikarakarana izao atrikasa nifarana androany zoma 13 novambra 2020 izao.izao.