Catégorie : Autres Evenements

Pejy an-tsary androany Zoma 26 Febroary 2021 eto amin’ny ENAP Antetezambaro-Toamasina:

Famaranana ny 4 andro nanaovana ny atrikasa fiofanana momba ny fitantanam-bola amin’ny ankapobeny, ho an’ireo IAP sy ireo mpikirakira vola eo anivon’ny Fandraharahana ny Fonja avy amin’ny Faritra Aalamanga, Itasy, Alaotra Mangoro ary Atsinanana.

Pejy an-tsary androany Alakamisy 25 Febroary 2021 eto amin’ny ENAP Antetezambaro-Toamasina:
Andro fahatelo amin’ny atrikasa fiofanana momba ny fitantanam-bola amin’ny ankapobeny, ho an’ireo IAP sy ireo mpikirakira vola eo anivon’ny Fandraharahana ny Fonja avy amin’ny Faritra Aalamanga, Itasy, Alaotra Mangoro ary Atsinanana.

Nisokatra ny talata 23 Febroary 2021 eto amin’ny Sekolim-pirenena ho an’ny Fandraharahana ny Fonja (ENAP) Antetezambaro – Toamasina ny atrikasa fiofanana momba ny fitantanam-bola izay atrehin’ireo « Inspecteur d’Administration Pénitentiaire » (IAP) miisa 27. Haharitra 4 andro ny fiofanana, ho an’ireo IAP sy ireo mpikirakira vola avy amin’ny Faritra Aalamanga, Itasy, Alaotra Mangoro ary Atsinanana. Tanjona ny hanamafisana ny traikefa sy fahaiza-manao amin’ny lafiny fitantanam-bola. Manohana ny fiofanana ny tetikasa PAJMA (Projet d’appui à la Justice à Madagascar).
Tsiahivina fa efa vita tamin’ny taona 2020 ny fiofanana ho an’ireo IAP avy any amin’ny tapany atsimon’ny Nosy izay natao tany Fianarantsoa, ary ny avy amin’ny tapany avaratry ny Nosy natao tany Mahajanga.

Ny 22, 23, 24 febroary 2021 teo no notanterahina tany Antalaha ny iraka fanitarana ny fepetra fahafahana arahi-maso izay voatondro ao amin’ny Lalàna laharana 2016.018 tamin’ny 22 aogositra 2016 mikasika ny fepetra sy paika arahina ampiharina amin’ny ankizy nanao heloka.
Izany iraka izany dia notanterahina teo ambany fitarihan-dRamatoa Tale Jeneraly ny Foibem-pitondrana Ankapobeny ny Raharaham-pitsarana, ny fandinihana sy fanavaozana ny lalàna mba ho fametrahana ny fepetra fahafahana arahi-maso any amin’ny faritry SAVA ary niarahana tamin’ny Unicef sy ny Fikambanana « Grandir Dignement » izay miara-miasa akaiky amin’ny Ministeran’ny Fitsarana amin’ny fanatanterahana ny asa atao amin’izany fepetra asolo ny famonjana izany.
Tao anatin’izany iraka izany no nanaovana fihaonana niaraka tamin’ireo tompon’andraikitra tao an-toerana izay hiara-hiasa amin’ny fanatanterahana ny fepetra fahafahana arahi-maso narahina fihaonana tamin’ny mpikambana ao amin’ ny tambazotra fiarovana ny zaza. Nisy ihany koa ny atrikasa natao niaraka tamin’ny Mpitsara ny zaza tsy ampy taona sy ireo Mpitsara rehetra teo anivon’ny Fitsarana Ambaratonga Voalohany ao Antalaha.
Marihina fa ny fahafahana arahi-maso dia fepetra iray asolo ny famonjana ka mametraka ny ankizy nanao heloka hitoetra eo anivon’ny fianakaviany ihany saingy eo ambany fanaraha-mason’ny Fitsarana . Izany fanaraha-maso izany dia iantohan’ny mpiasa ara-tsosialy izay misahana ny fanarenana ny zaza. Ny fitsarana ambaratonga voalohany ao Antalaha no Fitsarana faha-efatra nametrahana ny fepetra fahafahana arahi-maso tao aorian’ny Fitsarana ao Antananarivo, Mahajanga ary Antsiranana.
Nararaotina tao anatin’izany iraka izany ihany koa ny fitsidihana ny faritry ny fonja misy ny ankizy sy ny vehivavy ao amin’ny Fonjan’Antalaha ka niarahana hatrany tamin’ny Unicef sy ny Fikambanana « Grandir Dignement » izay manohana ihany koa ny ankizy voafonja amin’ny lafiny ara-tsakafo sy manampy amin’ny fanarenana azy ireo.

Ela nitoratorahana ka nahavoa voamason’angatra. Olona miisa 4, ka lehilahy ny telo ary vehivavy ny iray, no naiditra am-ponja vonjimaika (MD) rehefa avy niakatra Fampanoavana tetsy Anosy androany 19 Febroary 2021. Ireo lehilahy telo any Tsiafahy ary ilay vehivavy kosa etsy Antanimora. Voasambotry ny polisim-pirenena misahana ny heloka bevava (BC) izy ireo ny 16 Febroary 2021, noho ny raharaha fanendahana Mpandraharahan’ny Fonja.

Teny 67Ha no nanaovan’izy ireto ny asa ratsiny, izay tsy vao voalohany izao. Mpandraharahan’ny Fonja avy any Arivonimamo, nody hariva rehefa avy nanatitra voafonja teny Antanimora ny harivan’ny 16 Febroary 2021 no voadaroka tamin’ny hazo sy voan’ny sabatra ka naratra mafy tokoa: vokany, very tamin’izany ny basy iray marika MAT 49.
Andro vitsy monja taorian’ny namelezany ireo Mpandraharahan’ny Fonja, dia vehivavy miisa roa miasa amina orinasa tsy miankina eny 67 Ha no lasibatr’ireto totakely, ary nampiasany ny basy nendahiny tamin’ireo Mpiandry Fonja.
Taorian’ny fisamborana azy ireo, dia efa niverina amin’ny tompony ny basy very. Mbola misy olona miisa 4 karohina momba ity raharaha ity.