Catégorie : Autres Evenements

9

15

📌Tontosa androany Alatsinainy 14 Febroary 2022 teto amin’ny Ministeran’ny Fitsarana eto Faravohitra, ny lanonana fanolorana fitaovana informatika sy ho an’ny birao, avy amin’ny Biraon’ny Firenena Mikambana miady amin’ny Zava-mahadomelina sy ny Heloka na UNODC. Fitaovana mitentina 108.000 Dolara, izay tafiditra indrindra ao anaty Fandaharan’asa Hiadivana amin’ny tsy Fandriam-pahalemana An-dranomasina na GMCP, aty amin’ny tapany Andrefana amin’ny Ranomasimbe Oseana indiana.

➡️Ireo dia atolotra ho an’ny Fitsarana Ambaratonga Voalohany (TPI) ao Toamasina sy Mahajanga, ary ny Fitsarana Ambony (CA) ao Toamasina sy Mahajanga, ho fanohanana ny asan’izy ireo, sy ho fanatsarana ny lafiny fandriam-pahalemana an-dranomasina eto Madagasikara.

⭐ Toy izao avy ireo fitaovana :
Solosaina miisa 40, « Onduleurs » miisa 40, « Imprimantes » miisa 17, « Cartouches d’encre » miisa 27, « Armoires de bureau » 50 isa, seza miisa 240 ho an’ireo manan-draharaha, latabatra birao 100 ary seza birao 60.

🔷Zava-dehibe loatra ho an’ny Fitsarana Malagasy ny fahazoana azy ireo, indrindra amin’izao vanim-potoanan’ny haikajy mirindra sy ny nomerika izao. Nanolotra ireo fitaovana ny « Consultant National Point Focal » an’ny UNODC eto Antananarivo, Atoa HAMA Dimby Noëlson, nandray izany kosa ny Sekretera Jeneralin’ny Ministeran’ny Fitsarana, Rtoa RABY SAVATSARAH Ain’Harimanga Gabrielle.

📌 Tontosa androany Sabotsy 12 Febroary 2022, ny andiany voalohany amin’ny fanaovam-baksiny amin’ny ady amin’ny valanaretina Covid-19, ao amin’ny Fonjaben’i Tsiafahy. Voafonja miisa 104 no vita vaksiny tamin’ity andiany voalohany ity. Ny vaksiny « Janssen » no natao. Mbola hitohy ny hetsika.

➡️ Araka ny vaovao nampitain’ny Lehiben’ny Fonjan’i Tsiafahy, ny « Contrôleur d’Administration Pénitentiaire » RABENATOANDRO Lahatra Willy, dia fiaraha-miasa amin’ny Ministeran’ny Fahasalamam-bahoaka no nahatontosa ny hetsika. Safidy malalaka no nomena ireo voafonja amin’ny fanaovana ny vaksiny fa tsy an-tery.

💡 Mitondra fanampim-panazavana ny « Médecin Inspecteur Tanà Sud », Dokotera RASOLONDRAIBE Hasina.

📌 Tarigetra ny fahaiza-mitantana. Ho an’ny fisokafan’ny Tetibolam-panjakana 2022, dia nanaraka fiofanana ireo tompon’andraikitra isan-tsokajiny rehetra amin’ny fitantanam-bola eto anivon’ny Ministeran’ny Fitsarana. Atrikasa notontosaina androany Alatsinainy 07 Febroary 2022, teny amin’ny Sekolim-pirenena manofana ho Mpitsara sy Mpiraki-draharaha (ENMG) Tsaralalàna. Nampiofana sy nizara traikefa, ireo tompon’andraikitra avy amin’ny Ministeran’ny Toe-karena sy ny Tetibola. Teboka maromaro no nifantohan’ny fiofanana. Ohatra ny pitsopitsony tsy maintsy hajaina, toy ny famoaham-bola anatiny, ny fiovan’ireo tompon’andraikitra voatendry, ny fandaniana mihoatra ny 20 tapitrisa Ariary, sns.

Zava-dehibe loatra ho an’ny firenena ny fananan’ireo mpikirakira volam-panjakana fahaizana sy traikefa amin’ny fanatontosany ny asany. Nanamafy izany tanaty lahateny fanokafana, ny Tale Jeneralin’ny Fandaharan’asa sy ny Fampitaovana (DGPR), Atoa RAVELOSON Aimé Gilbert.

📌Misy ireo fotodrafitrasa simba, ao amin’ny Faritra Atsimo Atsinanan’ny Nosy, taorian’ny fandalovan’ny rivodoza Batsirai. Ohatra ny fonja ao Ikongo sy Farafangana ary Vangaindrano, ary koa ny lapan’ny Fitsarana sy ny fonja ao Mananjary. Ho an’Ikongo manokana, dia voatery nafindra vonjimaika ao amin’ny « Lycée » ireo voafonja. Tsy afaka ny ajanona ao maharitra nefa izy ireo, koa tsy maintsy ho afindra ao amin’ny Ivotoerana ho an’ny Kolotsaina mandram-pahavitan’ny asa fanamboarana sy fanarenana ny fonja. Manome tanana ireo Mpandraharahan’ny Fonja amin’ny fiambenana ny avy amin’ny Polisim-pirenena sy ny Zandarimariam-pirenena.

✔️ Ho an’ny fonja ao Farafangana sy Vangaindrano dia efa vita ny asa fanamboarana ireo tafo nentin’ny rivotra. Ho an’ny Lapan’ny Fitsarana ao Mananjary, dia voaaro tsara ireo antontan-taratasy na dia nisy ny fahavakisan’ireo fitaratra sy fahasimbana. Hatomboka tsy ho ela ny asa fanamboarana. Ho an’ny fonja, dia nafindra ao amin’ny toeram-pivavahana ny voafonja miisa 59.

💡 Mitondra fanazavana tahaka izao, ny Sekretera Jeneralin’ny Ministeran’ny Fitsarana, Rtoa RABY SAVATSARAH Ain’Harimanga, nandritra ny valan-dresaka ho an’ny mpanao gazety androany 07 Febroary 2022 teto amin’ny Ministeran’ny Fitsarana eto Faravohitra.