Catégorie : Autres Evenements

📌 Lanonana fitokanana foto-drafitr’asa vita teto amin’ny Fonjaben’ny Miarinarivo (Maison Centrale) niarahana tamin’ny Tale Jeneralin’ny Fandraharahana ny Fonja Andriamatoa RANDRIANANDRASANA Désiré, izay nisolotena ny Mpitahiry ny Tombokasem-panjakana, Ministry ny Fitsarana sy ireo mpiara-dia aminy ary ny Mpiara-miombon’antoka Fikambanana « Ancre du Salut » teto Miarinarivo.
Notronin’ireo Manam-pahefana isan-tsokajiny teo an-toerana; Ny Sekretera Jeneralin’ny Governoram-paritra ary ny solotena avy amin’ny « Consulat de l’Ambassade des Etat Unies ».

✔️ Fanavaozana ny Biraon’ny Lehiben’ny Fonja sy ny mpiara-miasa aminy (Greffes) ;
✔️ Fanamboarana ny trano fidiovana sy ny toerana fanasan-damba ho an’ireo voafonja ;
✔️ Fananganana ny trano vaovao mahazaka voafonja 100 izay mbola eo am-pamaranana ny asa ;
✔️ Fandokoana ny tambohon’ny fonja.

⭕ Ho mariky ny fankasitrahana azy ireo dia notolorana mari-pankasitrahana avy amin’ny Mpitahiry ny Tombokasem-panjakana, Ministry ny Fitsarana Andriamatoa RAKOTOZAFY François ny Filoha Mpitantana ny Fikambanana « Ancre du Salut ».

Eo anatrehan’ny fanomanana ny adina am-bava (Oral) amin’ny fifaninanana hidirana mpianatra ho Mpitsara eto amin’ny Sekolim-pirenena Mampiofana ho Mpitsara sy Mpirakidraharaha (ENMG), dia nanome toromarika sy niresaka mahakasika teboka vitsivitsy ny Tale Jeneralin’ny Sekolim-pirenena Andriamatoa RAMAROLAHIHAINGONIRAINY Anthony :

⭕ Aoka tsy ho azon’ny fakam-panahy hijoboka hanao kolikoly, fa madio sy mangarahara
ny fifaninanana.

⭕ Tsy vitan’ny sekoly sy ny Tale Jeneraly irery anefa ny ady amin’ny kolikoly
fa mila ny fandraisan’andraikitra sy fifanampiana avy amintsika tsirairay ;
satria izay tsy manao kolikoly dia efa miady amin’ny kolikoly. Ary aoka tsy hohadinoina fa henjehin’ny lalàna velona na ny mpanome na ny mpandray izany ;

⭕ Manome toky ny sekoly, ary miezaka amin’ny fomba rehetra mba hadio sy hangarahara
ny fifaninanana rehetra ;

⭕ Mba hisian’ny fifampitokisana, dia teratany vahiny na « Cabinet international » no manara-maso sy mikirakira ny solosaina mahakasika ny naoty rehetra, ary hatrehin’ny tompon’andraikitra mahefa isan-tsokajiny izany ;

⭕ Ary notsindriany manokana fa ny tsy fahafahan’ny mpiadina iray mahay tsy midika fa nisy ny kolikoly, fa amin’ny maha fifaninanana azy dia izay tena ambony ny naoty no afaka ; indrindra efa taona maromaro ihany no tsy nisy ny fifaninanana ka zava-dehibe ny fanomanana.

🎥 Entina aminao manontolo ny fanazavana nentin’ny Tale Jeneralin’ny Sekolim-pirenena Mampiofana ho Mpitsara sy Mpirakidraharaha,
Andriamatoa RAMAROLAHIHAINGONIRAINY Anthony.

📌 Araka ny efa fantatra dia eraky ny faritra ny fanaovana ny « Hetsika fanomezana kopia sy karapanondro ho an’ny vahoaka malagasy izay tsy mbola manana izany » ka tanteraka izany tao amin’ny faritra Mahatsiatra ambony tamin’ny zoma 14 Oktobra 2022 lasa teo. Kaominina 18 tao amin’ny Distrika Ambohimahasoa no vita tanteraka izay notsinjaraina tao Camp- Robin , Ankafina Tsarafidy , Sahatona ary Ambohimahasoa. Ary tohizana any amin’ny Distrikan’ Ambalavao indray ny izany. Marihina fa misy 7 ny Distrika misy any.
Nisitraka izany koa Ny Distrikan’ Ambatolampy sy Antanifotsy ka olona miisa 683 no nahazo ny kopia sora-pahaterahana sy karapanondrom-pirene­na hatreto.
Ho an’ny Distrikan’ Andramasina indray dia vinavinaina ho hatomboka ny Alatsinainy 25 oktobra 2022 ny hetsika.

Fankalazana manetriketrika ny faha-85 taonan’ ny holafitry nry mpisolo-vava eto Madagasikara eto amin’ny Fitsarana Ambartonga Voalohany Anosy.

📌 Mitohy hatrany ny « Hetsika fanomezana sora-pahaterahana sy karapanondrom-pirenena maimaimpoana » izay handraisan’ny fitsarana anjara andraikitra goavana. Nanomboka izany ny avy ao amin’ny faritra Morondava anio ary koa ny tao amin’ny kaominina ambanivohitra Manalalondo sy ny manodidina sy ny tao Antsahabe distrikan’ny Antsohihy.
Ny tao amin’ny distrikan’ny Fenerivo-Atsinanana kosa dia nanomboka ny Alarobia 05 Oktobra 2022 tao Mahambo.