Catégorie : Autres Evenements

Ny alarobia 05 aprily 2023 no notontosaina tao amin’ny efitrano malalaky ny Radisson Blu Ankorondrano ny tatitra fintina mikasika ny « Etat des lieux sur la situation des personnes atteintes d’albinisme à Madagascar ».
📌 Fikarohana niezahana mba hamantarana ny zava-misy marina iainan’ny olona manana toe-tena varira, taorian’ireo herisetra sy fakana an-keriny ireo olona varira, izay nahazo vahana tao anatin’ny 3 taona farany.

📌 Tompomarika tamin’ny fahavitan’ity karokevitra mikasika ny zavamisy iainan’ny olona manana toe tena varira ity ny Governemanta Malagasy izay notarihan’ny Ministeran’ny Fitsarana ary notohanan’ny Unicef Madagascar sy ny Haut Commissariat aux Droits de l’Homme.

📌 Tomponandraikitra avy amin’ny ankolafin-kery maro moa no tonga nanatrika ity tatitra fintina ity, ka anisan’izany ireo solon-tena avy amin’ny Ministera maro, ny avy amin’ny Firenena Mikambana, ny mpiara-miombon’antoka ara-teknika sy ara- bola, ny fiarahamonim-pirenena izay ahitana ny fikambanan’ireo olona manana toe-tena varira.

📌 Fanombohana ihany ity fikarohana vita ity ary hotohizana amin’ny famolavolàna drafitr’asa nasionaly hiarovana ireo olona manana toe-tena varira, hanamafisana ny fahafahany misitraka ireo zo fototra isankarazany ary ny hanamoràna ny fizakan-tenan’izy ireo.

📌 Nohamafisin’ny voka-pikarohana nozaraina androany ny mahazavadehibe ny fifanomezan-tanana sy ny fifarimbonan’ny sehatra rehetra miankina sy tsy miankina amin’ny Fanjakana mba ho fiarovana sy hampiroboroboana ny zon’ny olona manana toe-tena varira.

📌 Camp pénal Vatomandry no nanokafana ny asa mahakasika ny fikarakarana ny Fonja ary indrindra ireo voafonja amin’ny alalan’ny fanomezana fitaovana ahafahan’izy ireo miavotra ara-tsakafo ary mampivoatra ny lafiny mahaolona azy amin’ny fandraisana andraikitra sy an-tanana ny fikarakarana ireo fambolena vokatra ho azy ireo ihany.
Fokontany Tsaratanana, 15 km miala eo Vatomandry, velaran-tany 50Ha no nambolena vomanga avy hatrany nanomboka ny 1 aprily lasa teo.

⭕️ Sombiny ihany izao vita izao manoloana ireo vina fanitarana sy fametrahana Camp pénal amin’ireo Fonja manerana ny Nosy eo ambany fitantanan’ny Mpitahiry ny Tombonkasem-panjakana, Minisitry ny Fitsarana R/toa Landy Mbolatiana RANDRIAMANANTENASOA.
Misitraka avy hatrany izay vokatra amin’izany moa ny Fonjan’ny Vatomandry mikarakara ny tany sy fambolena.

📌 Nandritra ny roa andro dia nifantoka tamin’ny fametrahana ny komity hitarika, hamolavola, hanatanteraka sy hanara-maso ny fampirindrana ireo didy raikitra rehetra eny anivon’ny Fitsarana ny Minisiteran’ny Fitsarana nisy ny Sekretera Jeneraliny Gabrielle Ain’Harimanga Raby Savatsarah sy ny filohan’ny Fitsarana Tampony Rakotonavalona Ranary Robertson ary ny PNUD mpiara-miombon’antoka.

⭕ Tsiahivina fa vao andro vitsy izay no nihaona ny solontena maharitry ny PNUD Natasha Van Rijn sy ny Mpitahiry ny Tombokasem-panjakana Minisitry ny Fitsarana Landy Mbolatiana RANDRIAMANANTENASOA nanamafy ny fiaraha-miasa eo amin’ny roa tonta. Tafiditra ao anatin’izany indrindra ny Projet RINDRA tohanan’ny USAID sy PNUD : fanamafisana fifampitondrana eto Madagasikara mitondra izao atrikasa izao.

🔴 Ny fampirindrana ny didy raikitra dia hampihena ny fiakaran’ireo raraharaha any amin’ny fitsarana fandravana, hisoroka ny fahasamihafan’ny didy havoaka amina raharaha mitovy ary hiantoka ny filaminan’ny asam-pitsarana.

♦️ Ny fahatanterahan’io tetikasa io dia manamafy ny fitondrana tsara tantana kasaina apetraka, tafiditra tanteraka ao anatin’ny fanafainganana ny fitantanana ny asam-pitsarana ary manamora ny fikarakarana ireo olom-pirenena manana raharaha hotsaraina.

📌Notanterahina tao amin’ny Kaominina Ambanivohitra Ambohitseheno, Distrikan’i Manjakandriana ny fampahafantarana ireo paik’ady ara-pitsarana sy fanapariahana lalàna.

⭕ Ny Sampandraharan’ny Fanapariahana lalàna ao amin’ny Foibem-pitondrana momba ny Fandinihana sy ny Fanavaozana lalàna (DERL) eto anivon’ny Ministeran’ny Fitsarana no nitondra ny fanentanana sy fanazavana manoloana ireo tomponandraikitra maro samihafa sy ireo mponina tao an-toerana sy ny manodidina.

🔴 Novelabelarina nandritra izany ny mikasika :
– ny fiankohonana ;
– ny fiarovana ny zon’ny vehivavy sy ny ankizy ;
– ny ady atao amin’ny herisetra mifototra amin’ny mahalahy sy mahavavy ;
– ny manodidina ny fananan-tany ;
– ny hetra trano sy ny hetra tany ;
– ny fanenjehana ny fandikan-dalàna.
📌Hitohy manerana ny Faritra maro ny hetsika izay tohanan’ny PAJMA.

📌 Ny fanatsarana ny kalitaon’ny fiainan’ireo voafonja dia anisan’ireo laharam-pahamehana eto anivon’ny Ministeran’ny Fitsarana, anatin’izany ny fahavitan-tena ara-tsakafon’ireo voafonja. Miara-mientana arak’izany ireo mpiaramiasa isan-tsokajiny eto anivon’ny Ministera amin’ny asa famokarana.

⭕Ny tombim-pamokarana Beampolo Fonja Fandriana, Fitaleavam-paritry ny Fandraharahana ny Fonja (DRAP) Amoron’i Mania, manana tany vita voly vary 4 Ha, haninkotrana 5 Ha.