Catégorie : Autres Evenements

📌 Alarobia faha -27 Jolay 2023, nalefan’ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana hanaramaso ny fivoaran’ny asa famokarana ato amin’ny Camp Pénal Ambatoboeny ny Tale Jeneralin’ny Fandraharahana ny Fonja.

☑ Nandritra izany dia tsikaritra fa miroborobo ny famokarana. Ho an’ny Camp Pénal eto Begara, tsara faniry ny katsaka sy ny lojy, na dia misy aza ny biby mpanimba voly izay efa voafehin’ny tompon’andraikitra. Mizara roa ny taom-pambolena ho an’i Begara dia ny asara sy ny maintany ka voly maro no azo hatao mifandimby. Efa voajinja tamin’ny Volana Aprily sy ny Volana May lasa teo ny vary tamin’ny velaran-tany 60 ha ary amin’izao fotoana izao dia miakatra ny vokatra voanjo. Manana omby miisa 6 ny Camp Pénal eto Begara. Ho an’i Marofilao na dia mitsitokotoko aza ny toerana misy ny voly, nohon’ny toe-tany dia hita fa lehibe ny velaran-tany voavoly ary mihevitra ny hanampy hatrany amin’ny 40h ny tompon’andraikitra amin’ny taom-pambolena manaraka, na eo aza ny olana amin’ny toetry ny rano sy ny toetry ny tany. Manana omby miisa 16, sy osy miisa 58 ny Camp Pénal eto Marofilao. Raha mitohy ny ezaka hataon’ ireto Camp Pénal eto Ambatoboeny ireto dia ho tratra ny tanjona napetraky ny Minisitry ny Fitsarana, dia ny fahavitan-tena ara-tsakafo eny anivon’ny Fonja.

Anjaran’ny Foulpointe sy Fenoarivo Atsinanana indray izao no handray ny « Fiara Zo ».
📌 Ny 24 jolay 2023 ao Foulpointe ;
📌 Ny 26 jolay 2023 ao Fenoarivo Atsinanana.

📌 Zoma 30 Jona 2023, noho ny fiaraha-miasa eo amin’ny Ministeran’ny Fitsarana sy ny fikambanana AXIAN ary Grandir Dignement miaraka amin’ny fanoanan’ny Mvola, Vitafoam, First immo, connecteo, Pulse, Sanko ary AGL dia afaka nankalaza ny volan’ny ankizy tahaka’ireo ankizy rehetra ireo vofonja tsy ampy taona eto Antanimora.

✅ Nohavaozina ny faritry ny fonja mba ho mendrika azy ireo, nolokoina, ary nohatsaraina ny anatiny rehetra ary notolorana zava-maro ihany koa toy ny savony, baolina, ankanjo, kidoro , lamba firakotra, vato mamy, koveta, vilany sy ny kojakoja an-dakozia. Izany dia ao anatin’ny fitsinjovana ny zon’ireo ankizy voafonja mba hihaina tsara ohatran’ny ankizy rehetra.

⭐ Tonga nanotrona sy nanome voninahitra ny fotoana ary nisolotena ny Mpitahiry ny Tombokasem-panjakana, Ministry ny Fitsarana ny Tale Jeneralin’ny Fandraharahana ny Fonja , A/toa RALISAONA Arsène.

🎤 Fanadihadiana fohifohy ny Tale Jeneralin’ny Fandraharahana ny Fonja, A/toa RALISAONA Arsène,
nisolo tena ny Mpitahiry ny Tombokasem-panjakana, Ministry ny Fitsarana nandritra ny fankalazana ny volan’ny ankizy teny amin’ny fonjaben’Antanimora.
🎥 Manasa anao hanaraka izany.

📌 Ny Alakamisy faha – 29 Jona 2023, Tonga teto amin’ny Minisiteran’ny Fitsarana ny Delegasiona avy amin’ny Firenena mikambana , ny Vondrona Eoropeana ary ny Vondrona Afrikana. Fitsidihana izay tafiditra ao anatin’ny dinika fanamafisana ny Fandriampahalemana, mikasika ny fifehezana ny fitaovam-piadiana. Nandray azy ireo ny Talen’ny Kabinetra eo anivon’ny Minisiteran’ny Fitsarana.

➡ Tanjona ankapobeny amin’izao iraka izao ny hametrahana paik’ady mazava iraisan’ireo Minisitera miandraikitra ny filaminana, Dia ny Primatiora, ny Minisiteran’ny Fiarovam-pirenena, ny Minisiteran’ny Fitsarana, ny Minisiteran’ny Filaminam-bahoaka, ny Minisiteran’ny Atitany sy ny fitsinjaram-pahefana ary ny Sekreteram-panjakana misahana ny Zandarimariam-pirenena, ho fanantanterahana izany.

📌Alarobia 14 jona 2023. Tontosa teto Mahajanga ny fiofanana andiany fahatelo tamin’ilay “Fampiofanana mitohy” (na formation continue) nomena ireo Infirmiera Mpandraharahan’ny Fonja taty amin’ny ilany Andrefana sy Avaratry ny nosy.

➡️Toy ny tany Toamasina sy Toliara ihany dia naharitra 8 andro ny fiofanana ka 23 mianadahy ireo izay nisitraka ny fampiofanana tamin’izany, izay avy any amin’ny faritra BETSIBOKA, BOENY, SOFIA, DIANA, SAVA ary MELAKY.

📍Tsara ho marihina fa efa nisy fiofanana roa natao talohan’izao ka ny andiany voalohany dia natao tany Toamasina nahitàna mpiofana 45, ny faharoa dia tany Toliara nahitàna mpiofana 23 ary ny fahatelo dia izao eto Mahajanga izao. Arak’izany dia nahatratra 91 ireo Infirmiera mpandraharahan’ny fonja nisitraka ny fiofanana manerana ny nosy ary samy notolorana Mari-pahaizana tsirairay avy izy ireo.

☑️ Izany rehetra izany no tontosa dia noho ny tetik’asa MIKOLO AINA tarihin’ny “Douleurs Sans Frontières”, iray amin’ireo tetik’asa 3 arindra eo anivon’ny Fandaharan’asa FANARENANA eto anivon’ny Ministeran’ny Fitsarana izay nahazahoana famatsiam-bola avy tamin’ny Agence Française de Développement. Tsara ho fantatra ihany koa fa ny fampiofanana rehetra natao dia nivondronan’ireo mpampiofana matianina avy ao amin’ny DIFP/Ministeran’ny Fahasalamabahoaka, ny Vokovokomena Malagasy ary koa ny lehiben’ny sampandraharahan’ny fahasalaman’ny voafonja (SSPD) ao amin’ny DHDPRS/MinJus.

➡️Izany rehetra izany no natao dia mba ho fanatanterahana ny velirano faha 5-n’ny Filoham-pirenena « Fahasalamana ho an’ny rehetra, sy ho amin’ny taona rehetra ».

🔴Izao ihany koa dia ho fanatrarana ny tanjon’ny Ministeran’ny Fitsarana : « actions 174 et 175 » izay mikendry ny fanatsarana hatrany ny tontolon’ny Fandraharahana ny Fonja, amin’ny alalan’ny fanomezana fiofanana mitohy manaraka ny fiovan’ny teknika fandraisana marary sy ny filan’ny tolotra ara-pahasalamana, ho an’ireo voafonja.