Catégorie : Annonces et Informations

Posted in Annonces et Informations

Drafitra EPU

Published Date: 1 décembre 2020

NY FIAROVANA NY ZON’OLOMBELONA NO HIMASOANA

Nifarana ny 02 desambra 2020 tao amin’ny Hotel des Thermes Antsirabe ny atrikasa voalohany fandrafetana ny drafitra fanatanterahana ireo toromariky ny Filankevitry ny Zon’olombelona eo anivon’ny Firenena Mikambana ao anatin’ilay hoe “Examen Périodique Universel” na EPU, sy ireo Rafitra mpanara-maso ny fifanarahana iraisam-pirenena ary ny mpanao tatitra manokana.

Nandray anjara tamin’ny atrikasa ireo mpikambana avy ao amin’ny Komity manoratra ny tati-panjakana momba ny zon’olombelona, ny Vaomieram-pirenena mahaleotena momba ny zon’olombelona ary ny avy amin’ny fiarahamonim-pirenena. Tsiahivina fa toromarika miisa 192 no neken’I Madagasikara nandritra ny fanadinana ny tatitra natao tany Genève tamin’ny novambra 2019. Ny fanatsaràna sy fampiroboroboana ny fiarovana ny zon’olombelona, indrindra ny zon’ny ankizy sy ny vehivavy, no nahazoana fanamarihana betsaka. Noho izany dia fandrafetana ny drafitra ho fanatanterahana ireo toromarika ireo mandritra ny 4 taona ho avy, no natomboka tao Antsirabe ny 30 novambra teo.

Tanjona ny haha-fitaovana hatao tondrozotra izao drafitra izao, no sady hanomanana ihany koa ny Tatitra EPU faha-4 amin’ny taona 2024.

Posted in Annonces et Informations

Fanatsarana ny fitantanana ny raharaham-pitsarana

Published Date: 1 décembre 2020

MANARAKA FIOFANANA IREO LEHIBEN’NY MPIRAKI-DRAHARAHA

Fiofanana mandritra ny 4 andro no nisokatra androany maraina etsy amin’ny Sekolim-pirenerena ho an’ny Mpitsara sy ny Mpiraki-draharaha (ENMG) Tsaralalàna. Ireo Lehiben’ny Mpiraki-draharaha no miofana amin’ny lohahevitra « la comptabilité des greffes et le principe exécutoire des décisions judiciaires » na « ny fitantanana ny tao-kaonty eo anivon’ny lehiben’ny firaketan-draharaham-pitsarana sy ny fotokevi-panatanterahana ny didim-pitsarana ».
Maro ny tanjona amin’ny fampiofanana tahaka izao raha ny fanazavana. Anisany ny hanamafy ny fahaizana sy ny traikefa amin’ny fanatanterahana araka ny tokony ho izy ny asa, ny hahafehy ny paikady amin’ny fitantanana ny vola fanao an-tratra (provison). Ny hahavoatazona araka ny tokony ho izy ireo karazana rejisitry sy tao-kaonty ampiasaina, ny hampadio ny fomba fiasa, ny hahavitana ara-potoana ny kaonty. Ny hahafehezana ny andraikitra sy ny asa tokony hatao rehefa mivoaka ny didim-pitsarana, ny hanatsarana sy ny mba tsy hampitarazoka ny asam-pitsarana.
Laharam-pahamehana ny hananan’ny mpisehatra sy ireo manana raharaha aty amin’ny fitsarana fahatokisana amin’ny asam-pitsarana, ary ny hametrahana hatrany ny tany tan-dalàna sy ny fitsinjovana ny vahoaka.
Amin’ny zoma izao moa vao hifarana ity fiofanana arahin’ireo Lehiben’ny Mpiraki-draharaha etsy amin’ny ENMG ity.
Posted in Annonces et Informations

Ady amin’ny kolikoly eto anivon’ny Fitsarana

Published Date: 26 novembre 2020

MIHATRA NY SAZY HO AN’IREO MANIA

Hampahafantarina ampahibemaso ato ho aty ny tatitra momba ny ady amin’ny kolikoly eto anivon’ny Fitsarana. Notontosaina androany tetsy amin’ny Hotely Colbert Antaninarenina ny atrikasa fankatoavana io tatitra io. Tafiditra indrindra ao anaty Velirano nataon’ny Filohan’ny Repoblikan’i Madagasikara, Atoa Andry Rajoelina sy tarigetran’ny Mpitahiry ny Fitombokasem-panjakana Minisitry ny Fitsarana Atoa Johnny Richard Andriamahefarivo ny famerenana ny hasin’ny Fitsarana sy ny fitokisan’ny vahoaka aminy.
Mihatra tokoa ny sazy ho an’ireo izay mbola minia mandika lalàna. Tsy hiasa mangina intsony ny Fitsarana fa hiezaka tokoa ny hampahalala ny olom-pirenena ny vokatry ny asany. Nandray anjara tamin’ity atrikasa ity ny avy ao amin’ny tetikasa « Ny Fanjakana ho an’ny daholobe » na NFD, ny Vondrona Eoropeanina (UE), ireo solontena avy amin’ny Fiarahamonim-pirenena, ary ireo tompon’andraikitra isan-tsokajiny eto anivon’ny Ministeran’ny Fitsarana.
Posted in Annonces et Informations

Fitsarana manakaiky vahoaka

Published Date: 24 novembre 2020

HIVOAKA NY BOKY TOROLALANA HO AN’NY REHETRA

Miroso ny asa fanatsarana ny tontolon’ny Fitsarana. Ny lafiny fitantanam-bola sy ny fikirakiram-bolam-panjakana indray ankehitriny no sehatra hiofanana mandritra ny 4 andro, nanomboka tamin’ny maraina. Mikarakara ny Fitaleavana misahana ny fampiofanana ireo Mpiraki-draharaha eo anivon’ny Sekolim-pirenena ho an’ny Mpitsara sy ny Mpiraki-draharaha (ENMG) etsy Tsaralalàna. Mpanohana ny « Agence Française de Développement » (AFD) amin’ny alalan’ny tetikasa PAJMA.

Manaraka ity fiofanana mitohy ity ireo mpitantam-bola eo anivon’ny tribonaly sy ny rafim-pitsarana manerana an’i Madagasikara. Tanjona ny hanamafy ny fahaiza-manao sy ny traikefa ho an’ireo mpikirakira vola rehetra amin’ireo ambaratongam-pitsarana telo misy eto amin’ny Nosy.

Miisa 8 ireo lohahevitra mandrafitra ny fiofanana omena. Anisany ohatra ny fitantanam-bolam-panjakana amin’ny ankapobeny, ny fandrafetana tetibola sy ny fanatontosana azy, ireo lalàna mifehy, ny pitsopitsony amin’ny famoaham-bola ary ny fanaraha-maso sy ny andraikitra mifanila aminy.

Izao dia tafiditra indrindra anatin’ny fanatsarana imasoan’ny Mpitahiry ny Fitombokasam-panjakana sy Minisitry ny Fitsarana, Johnny Richard Andriamahefarivo, sy laharam-pahamehana amin’ny Velirano nataon’ny Filohan’ny Repoblikan’i Madagasikara, Andry Rajoelina.

Posted in Annonces et Informations

Fitsarana manakaiky vahoaka

Published Date: 24 novembre 2020

HIVOAKA NY BOKY TOROLALANA HO AN’NY REHETRA

Laharam-pahamehana anaty Velirano nataon’ny Filohan’ny Repoblikan’i Madagasikara Andry Rajoelina ny fanatsarana ny asam-pitsarana. Milofo fatratra sy manao ny ainy tsy ho zavatra hanatratra ny tanjona ny Mpitahiry ny Fitombokasem-panjakana sy Minisitry ny Fitsarana Johnny Richard Andriamahefarivo. Atrikasa fiofanana miompana amin’ny fanatontosana ny vina Fitsarana manakaiky vahoaka sy Fitsarana misokatra ho an’ny rehetra no nisokatra aninkeo maraina ary haharitra  hateloana etsy amin’ny « Le Hintsy » Ambohimanambola.

Araka ny nambaran’i Rtoa Raby Savatsarah, Talen’ny Kabinetran’ny Ministeran’ny Fitsarana, « Zo fototra an’ny vahoaka ny manatona ny Fitsarana. Antom-piofanana ny hahafahana mamoaka boky torolalana hanampy ny rehetra manan-draharaha amin’ny Fitsarana anaty mangarahara tanteraka sy lavitry ny kolikoly ary mandala ny lalàna fototra. Lahadinika ny fototry ny olana amin’ny sehatry ny Fitsarana. Ireo mpiofana no mila mandroso vahaolana. Harafitra ho boky ireo ary ho zaraina » hoy Talen’ny Kabinetran’ny Ministeran’ny Fitsarana.

 « Ireo mpisehatra rehetra amin’ny asam-pitsarana, na Mpitsara, na Mpisolovava, na Mpiraki-draharaha, na Polisy sy Zandary sns. Tarigetran’ny Ministeran’ny Fitsarana ary fanamby apetraka ny hahatontonsa ireo rehetra ireo mba hivadika ho vokatra hita maso sy ho azo tsapain-tanana » hoy ny Sekretera Jeneralin’ny Ministera Atoa Imbiki Herilaza, izay nisolo tena ny Mpitahiry ny Fitombokasem-panjakana sy Minisitry ny Fitsarana Atoa Johnny Richard Andriamahefarivo.

Mpanohana akaiky izao hetsika izao ny « Organisation internationale de la francophonie » na OIF. Araka ny lahateny nataon’ny Mpisolotena maharitra monina sy miasa eto amintsika Rtoa Faouzia Abdoulhalik androany, dia mino sy manantena vokatra hita maso sy azo tsapain-tanana ireo mpamatsy vola iraisam-pirenena. Vonona hatrany izy ireo ny hanohana ny Governemanta Malagasy hanatrarana ny tanjona.

Amin’ny fiafaran’ity atrikasa fiofanana ity no handrafetana ny boky ho zaraina amin’ny daholobe, ho fanajana ny Demokrasia, sy ny tany tan-dalàna araka ny nambaran’ireo tompon’andraikitra isan-tsokajiny ireo androany.