Catégorie : Actualités

📌Alatsinainy, faha – 04 Martsa 2024.
Teto amin’ny Foiben’ny Minisiteran’ny Fitsarana, teto Faravohitra, no natao ny fananganan-tsaina. Nandritra izany no manariparitan’ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana ny paik’ady ho entina manamafy ny fanatsarana ny fitantanana ny asam-panjakana.

➡️Nambarany fa tsy maintsy atao ny fanaraha-maso mba hiantohana ny fanjakana tsara tantana, ho fanamafisana ny mangarahara sy ny tamberin’andraikitra amin’ny fitantanana . Torak’izany ihany koa ny fanatsara ny kalitaon’ny tolotra omena ny olom-pirenena, anatin’izany ny famokarana ny tranokala « Fitsarana Valio ny tarainako », izay fantsona mivantana hanehoana ny ahiahiny sy hahazoana valiny haingana sy mahomby. Mikasika ny fanatsarana ny kalitao sy ny fomba fiasa dia nohamafisiny ny maha zava-dehibe ny fametrahana politika sy fomba fiasa mahomby hiantohana ny kalitaon’ny tolotra ho an’ny vahoaka. Ankoatra izany dia hampiharina ny politika famaizana mikendry ny hanamafisana ny ady amin’ny asan-jiolahy sy ny fiarovana ny vahoaka.

⭕Nasehon’ny minisitra ihany koa ny ezaka vita nandritra ny telo volana voalohany. Ao anatin’ny 3 volana manaraka kosa ny fanamafisana ny fahaiza-manao, indrindra amin’ny alalan’ny fandaharan’asa entina hanatsarana ny kalitaon’ny asa hatolotra ny olom-pirenena. Notsindriany ny maha zava-dehibe ny « etika » sy ny fitondran-tena matihanina eo amin’ny fitantanana ny raharaham-panjakana, ary nohamafisiny ny tokony hanajana ny fitsipiky ny fahadiovana, ny mangarahara ary ny tamberin’andraikitra amin’ny fanatanterahana ny asa.

⭕ Teo am-pamaranana dia nambarany ny fepetra hentitra sy ny sazy ho an’ireo mpanolana, fepetra natao hampiharina avy hatrany mba hiadiana amin’ity heloka be vava ho fiarovana ny vehivavy sy ny ankizy.

📌Zoma , 01 Marsa 2024 sy Sabotsy, faha- 02 Marsa 2024.
Nijery ny fivoaran’ny asa teo anivon’ny Toby famokaran’ny Voafonja  » Camp Pénal » Moramanga sy Vatomandry ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana.

☑️Namokatra ny Voafonja ary tratra ny tanjona napetraka satria nasahana ny sakafon’ny Voafonja ny vokatra niakatra, ary nahavitana namaha ny olan’ ny tsy fahampian-tsakafo  » malnutrition » eo anivon’ny Fonja, na ho an’i Moramanga sy Ambatondrazaka, na ho an’i Vatomandry sy Toamasina.
Ho an’ny « Camp Pénal » eto Ampanifana, Fokontany Antsirinala Moramanga, mangahazo karazany roa no novolena tamin’ny alalan’ny fampiasana teknika vaovao ary masomboly voafantina no nampiasaina.

➡️Velaran-tany 4ha no norakofana mangahazo vokatra ao anatin’ny enim-bolana (6 mois). Mangahazo 400 fototra kosa no novolena ho an’ny vokatra herintaona sy tapany. Ity mangahazo vokatra herintaona sy tapany ity dia hitarina amin’ny velaran-tany mirefy 1ha ka hahazoana 1600 fototra eo ho eo.
Tanimbary mirefy 2ha ihany koa no efa voavoly ary ankoatr’ireo dia namokatra pastèque, mananasy, voatavo ary voanjobory.

⭕Ny Voafonja miisa 1600 amin’ny fonja’ Ambatondrazaka sy Moramanga dia efa nanjifa ny sakafo novokarina teo anivon’ny « Camp Pénal » tamin’ny taona 2023, ary nahasahana azy ireo izany.
Ho an’ny « Camp Pénal » eto Tsaratanana Vatomandry, tany mirefy 52 ha no novolena tao anatin’ny taom-pambolena mivelatra (grande saison), hahitana Vary 6ha, Katsaka 6ha, Mangahazo 40ha.

⭕Ankoatr’ireo vokatra handrasana dia nahavita nisahana ny sakafon’ny Voafonja eto Vatomandry sy Toamasina ny famokarana natao tamin’ny taona 2023. Nampiavaka an’i Tsaratanana ny famokarana Vomanga karaoty, izay hahitana singa marobe ahafahana miady amin’ny tsy fanjarian-tsakafo ( malnutrition) ary nahitam-pahombiazana ny fihinanan’ny Voafonja izany. Manana dobo fiompiana trondro ihany koa ny « Camp Pénal » Tsaratanana Vatomandry.

⭕Ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana dia nanamafy fa tsy maintsy hitarina ny velaran-tany azo volena eny anivon’ny « Camp Pénal », tanjona mantsy ny fahavitan-tena ara-tsakafo tanteraka eny anivon’ny Fonja, ny fanafoanana ny tsy fahampian-tsakafon’ ny Voafonja ary hahazoana mamatsy ny Fonja hafa.

✅Izany rehetra izany dia tafiditra ao anatin’ny fanajana ny zon ‘olombelona sy ny fanatsarana ny fitantanana ny raharaham-panjakana.

📌Alatsinainy faha 26 Febroary 2024.
Teto amin’ny Minisiteran’ny Fitsarana Faravohitra. Nosokafana tamin’ny fomba ofisialy ny takelaka  » Fitsarana Valio ny Tarainako ».

➡️Ny olona rehetra manana fitarainana mikasika ny raharaham-pitsarana sy ny zavamisy eny anivon’ny Fonja dia afaka mampiasa azy io amin’ny fotoana rehetra. Takelaka voaaro, ny « Fitsarana Valio ny Tarainako » ka ny Mpitaraina sy ny teknisianina mandray ny fitarainana ihany no afaka mifampita vaovao mikasika ny fitarainan’ny olona iray. 500 Ariary dia ahafahan’ny olom-pirenena mampiditra fitarainana amin’ny alalan’ny finday na solosaina. Voaray avy hatrany izany ka mandalo fanadihadiana ary mahazo valiny.

⭕Nambarany ny Mpitahiry ny Tombokasem-panjakana, Minisitry ny Fitsarana RANDRIAMANANTENASOA Landy Mbolatiana fa tafiditra tanteraka ao anatin’ny fanamafisana ny fanjakana tsara tantana sy ny ady amin’ny kolikoky ary ny Fitsarana manakaiky Vahoaka ny fanokafana ity takelaka ity.

➡️Isan’ny tanjon’ny Minisiteran’ny Fitsarana rahateo ny fampiasana ny haitao ara-kajy mirindra amin’ny fampandehanana ny raharaham-pitsarana.
Efa misy mantsy ny sampan’asa miandraikitra fitarainana saingy taratasy marobe no kirakiraina.
Tombony ho an’ny Vahoaka mitaraina arak’izany ny fihenan’ny fotoana lany sy ny fihenan’ny vola mivoaka amin’ny fivezivezena.
Ny « Fitsarana Valio ny Tarainako » arak’izany dia sady fanamaivanana ny fahasahiranan’ny olona no famerenana. ny fahatokisan’ny Vahoaka ny tontolon’ny Fitsarana, ary tsy n’y eto an-toerana ihany fa na ny any ampitan-dranolasina aza dia afaka miditra amin’ny « www.fitsarana-valio-tarainako.mg » tranon-kala fandraisana fitarainana mikasika ny raharaham-pitsarana na ny fitantanana ny Fonja.

🎥 NANOKATRA IZANY TAMIN’NY FOMBA OFISIALY NY MINISTRA RANDRIAMANANTENASOA LANDY MBOLATIANA.

📌Alakamisy faha 22 Febroary 2024. Tonga teto amin’ny Foiben’ny Minisiteran’ny Fitsarana eto Faravohitra Ramatoa Josiane Yaguibou, solontenan’ny UNFPA, nihaona tamin’ny Mpitahiry ny Fitombokasem-panjakana, Minisitry ny Fitsarana RANDRIAMANANTENASOA Landy Mbolatiana. Fitsidihana ara-pomba fanajana niarahabany ny Minisitra nohon’ny fanendrena azy hitantana ny Minisiteran’ny Fitsarana indray.

⭕Noresahina nandritra izany ihany koa ny fanamafisana ny fiaraha-miasa eo amin’ny Ministeran’ny Fitsarana sy ny UNFPA indrindra ny momba ny fahasalamana ara-pananahana, ny zon’ny vehivavy sy ny tanora, ary ny lohahevitra samihafa. Nankasitrahan’ny UNFPA mantsy ny ezaka vitan’ny Minisiteran’ny Fitsarana, toy ny fanamafisana ny fiarovana ny zon’ olombelona amin’ny alalan’ireny lalàna maro nasiam-panavaozana ireo. Ao anatin’izany ny ady atao amin’ny herisetra mifototra amin’ny maha – lahy na maha – vavy, ny lalàna vaovao mikasika ny fanolanana zaza tsy ampy taona. Nifanaiky ny roa tonta fa hamafisina ny fiaraha-miasa mba tena fahitan’ny Vahoaka tombontsoa ireo ezaka vita ireo.

📌Talata 20 Febroary 2024, notoloran’i Mpitahiry Fitombokaseam-panjakana, Minisitry ny Fitsarana RANDRIAMANANTENASOA Landy Mbolatiana fitaovana ho entina mianatra asan-tanana ireo voafonja vehivavy teto amin’ny Fonjamben’Antanimora mba hizaran’izy ireo asa ho fanomana azy ireo hiverina eny anivon’ny fiaraha-monina.

Fitaovana fanaovana volo (brushings,brosses,produits…), Lafaoro ary misinina fanjairana no notolorana azy ireo.

⭕Ao anatin’ny vaindohan-draharahan’ny Minisiteran’ny Fitsarana ny fanomanana ny fiverenan’ny voafonja ho tonga olom-banona eo anivony fiaraha-monina. Nandritra ny lahateniny, ny Minisitry dia nanamafy fa tsy fanafaizana fotsiny ihany ny fonja fa natao indrindra ihany koa hampianatra sy hanarina an’ireo voafonja mba tsy ho vesatra eo anivon’ny fiaraha-monina (réinsertion sociale).

➡️Rehefa tapitra moa ny fiofanana dia hahazo mari-pahaizana na « Attestation de réussite » izay rehetra mahavita ny fiofanana.
Izao fanofanana izao dia ho tanterahana any amin’ny fonja hafa raha ny nambaran’ny Minisitra RANDRIAMANANTENASOA Landy Mbolatiana.

🎤Mitondra fanamarihana ny Mpitahiry ny Fitombokasem-panajakana, Minisitry ny Fitsarana RANDRIAMANANTENASOA Landy Mbolaatiana.